بلوچستان نا ضلع خضدار آن اِرا بندغ نا جونک خننگانو۔
جونک ہشت سال مُست بیگواہ کننگوک عابد حسین باوہ نا پن غلام حسین عمرانی و مست خان باوہ نا پن کہور خان لوٹانی نورگامہ نا ہندی تیٹ چائنگانو۔ ہرا زہری گزان کوچو ٹی کسر آن رسینگانو ہراڑے خلنگ مروکاتا چاہنداری پرچی تا نوشتہ مسنے، میت آتِہ خاہوت آتِہ تننگانے۔
15 اگست 2021 ئٹ کوئٹہ ٹی اڈ تروک وائس فار مسنگ پرسنز نا کیمپ ئٹی عابد حسین لُمہ برسا اونا زوراکی ئٹ بیگواہی ئے نوشتہ کریفیسس۔
خاہوت نا رد ئٹ عابد حسین ئے 28 اکتوبر 2017 آ خضدار ئٹی انجیرہ کراس آن با اثر انگا بندغ نا نائب مُلا مرید برمتہ کرسا ریاستی ادارہ غا تا دوٹی تسس۔ عابد حسین نا زوراکی ئٹ بیگواہی نا برخلاف ہر در ئے ٹھکیفنگا ولے ہچو اُمیت ئس خننگ متو اینو اوفتا جونک دوئی مسُنو۔
یاتی مرے کہ بلوچستان ئٹی اِرا دے تیٹی بلوچستان نا جتا ہند آتیٹی چھار بیگواہ کننگوک بندغ آتا جونک دو تمانو۔ ہنوکا دے آواران آن اِرا بیگواہ مروک بندغ آتا جونک دوئی مس اسُر۔ ہرافتا چاہنداری فقیر جان و عیسیٰ نا پن ئٹ مسس فقیر جان ئے 26 ستمبر 2024 آ اونا اُراغا چھاپہ نا وخت آ دزگیر کننگاسس و عیسیٰ ئے 17 فروری 2023 آ بیگواہ کریسُر۔
