خوانندہ غاک یونیورسٹی نا تہٹی فوجی کارندہ غا تا ساڑی گری نا برخلاف تولوک برانز کننگ ئٹی ءُ۔
شال ئٹی بولان میڈیکل کالج (بی ایم سی) نا بند مننگ و رہینگ جاہ (ہاسٹل) تا پولیس و فوجی کارندہ غا تا کوزہ نا برخلاف خوانندہ غا تا برانزی گدان ارٹمیکو دے ہم برجا ءِ، زوراک آ یخ ئٹی ہم خوانندہ غا تا بھلو کچ ئس برانز ئٹی بشخ ہلکنے۔
بلوچستان نا خوانندہ تنظیم آتا کُنڈ آن رہینگ جاہ تا کوزہ و ریاستی فوج ئنا کارندہ غا تا خواننگ جاہ تیٹ مننگ نا برخلاف درو آن یونیورسٹی نا بھلا درگہ نا مون آ تولوک برانز برجاء ءِ۔
خوانندہ غاک حکومت نا مونا مُسہ خواست تخانو۔
اسٹ دا کہ غُٹ دزگیر کننگوک خوانندہ غاتِہ زوت یلہ کننگہ، ارٹمیکو دا کہ بولان میڈیکل کالج و رہینگ جاہ تہ ولدا ملیر و مُسٹمیکو دا کہ تدینی ٹی اوار پولیس و کالج انتظامیہ نا برخلاف گام ہفنگہ۔
برانز ئٹی بشخ ہلوک خوانندہ غا تا پاننگ ءِ کہ کالج و رہینگ جاہ اوفتا خواننگ نا حق آتا ضمانت ءُ، ہرافتہ زوراکی ئٹ پھلنگ ئٹی ءُ، رہینگ جاہ و کلاس آتہ بند کرسہ نہ بیرہ ننے خواننگ آن مُر کننگک بلکہ بروکاتم ئے ہم نسخان تننگک۔
خوانندہ غاک پولیس نا ساڑی آ زوراکی آ تنقید کرسہ پاریر کہ ننا ڈوہ بیرہ ہندادے کہ نن خواننگ خواہینہ۔ ریاست و انتظامیہ خواننگ نا ماحول ئے خراب کرسہ بلوچ ورنا تہ پد بٹنگ خواہیرہ۔
برانز ئٹی بشخ ہلوک خوانندہ غال زوراک آ یخ ئٹی ہم تینا برانز ئے برجاء تخانو۔ او حکومت ئے خبڑدار کرینو کہ اگہ اوفتا خواست آک منّنگتوس تو برانز ئے زیات کننگو و غُٹ بلوچستان ئٹی برانز مرو۔
یات مرے کہ منَہ دے مہالو پولیس بی ایم سی نا رہینگ جاہ آ جلہو کرسہ خوانندہ غاتہ ہلکسس، ہراڑے بھازا خوانندہ غاک ٹھپی و بےسُد و سار مسوسر۔
پولیس نا دا گام ئنا برخلاف خوانندہ تنظیم آک برانز بناء کرسہ حکومت و انتظامیہ آ تنقید کرینو۔ خوانندہ غاتا پاننگ ءِ کہ دہنی ئٹ بلوچ ورناتہ خواننگ آن مُر کننگ نا کوشست کننگک۔
خوانندہ رہشون آک پولیس نا زوراکی ئے بلوچ و پشتون خوانندہ غاتا نیام ئٹی اختلاف ودی کننگ نا چم ئس پارینو۔ اوفتا پاننگ ءِ کہ دا گام خواننگ نا ادارہ غا تِہ فوجی مسخت آتیکن کاریم ئٹی ہتنگ نا کوشست ئس ءِ۔ نن دا چم ئے بےسوب کرسہ خواننگ نا ادارہ غا تیٹ امن ہتون۔
