دلجان بلوچ نا خاہوت نا برانز آواران ڈی سی آفس تون بیدی، آواران گیس پلانٹ و مشکئی کراس آ برجاء ءِ۔ جتا ٹک آتا مسافر آتا بھلو کچ ئس مُچءِ۔
خاہوت نا پاننگءِ کہ استو شام نادُرست بندغ آتا نیمغان ننے لاری سیٹ لتاڑنگ نا ناکام کوشست کننگا نن اسہ وار پدا آواران نا ضلعی انتظامیہ ئے دا پاننگ خواہنہ کہ اگہ برانز ئٹی ساڑی کس ئسے نسخان مس اونا زمہ وار انتظامیہ مرو۔
خاہوت نا رد ئٹ برانزی تے ضلعی انتظامیہ و پولیس نا نیمغان سیکیورٹی تننگ افس ہرا ہم جیڑہ سینا زمہ وار آواران پولیس و ضلعی انتظامیہ مرو۔ ضلعی انتظامیہ ڈی سی آواران اینو اسکان نا تینٹ برانز آ بسونے نا تینا زمہ دار تے ننے آ رائی کرینے۔ ڈپٹی کمشنر آواران برانزی تون ہیت ئٹ ہچو دلچسپی نشان تتنے ہرانا اخس مذمت مرے کمءِ۔
خاہوت مستی پارے کہ اسہ زالبول بلوچ ڈپٹی کمشنر ئے یخ ئنا شام تیٹ تولوک ایلو بلوچ زالبول آتا ہچو احساس اف ہرا ہنوکا چار شام آن آسمان نا مونا کسرتہ تولوکءُ۔ ضلعی انتظامیہ امر تینے بری الزمہ پاننگ کیک و تینٹ اسسٹنٹ کمشنر باقاعدہ دستخط کرسا تسونے کہ دہ دے تیٹی دلجان ئے آجو کننگے۔
