بی ایس او پجار نا مرید شمبیزئی، ڈاکٹر طارق بلوچ و ایلوفک گدان آ بسّر اواری نا درشانی کریر۔
وی بی ایم پی نا وائس چیئرمین ماما قدیر بلوچ تران کرسہ پارے کہ زورئٹ بیگواہ بلوچ خوانندہ سیاسی جہدکاراتہ سزا ترسہ شہید کننگ اوفتا لاش آتہ خسّنگ ئٹی پاکستانی فوج، ایجنسی، ایف سی، سی ٹی ڈی نا کمک کن راجی غدار، دُز، دھاڑیل، خونی و نشہ نا کاروبار کروکاتہ مُچ کرسہ و اقتدار نا لالیچی پارلیمانی جماعت آتا پِن ئنا اسمبلی، حکومت جوڑسہ اوفتہ بلوچ راجی جہد ئنا مون آ سلفنگ نا غُٹ پاکستانی چم آک بےسوب مسّنہ۔
ماما قدیر بلوچ مُستی پارے کہ بلوچ سیاسی راہشون، جہدکار، خوانندہ و نیاڑی تہ زورئٹ بیگواہ و شہید کروکاتیٹ پاکستانی فوج، ایجنسی و ایف سی اوار ءُ، ہرا بلوچ راج ئے توفک نا زور آ غلام جوڑسہ اونا مال و مڈی تہ لُٹ و پُل کیرہ۔ داسا بلوچ راج ئنا لائیخ و بھادرا چُناک فکری ءُ جنگ ئسے نا بنا ئے کرینُہ تو کوزہ گیراک تینا سُم تیٹ بلوچ راج ئنا چُنا تہ شہید کننگ ءُ، اوفتا لاش آتہ بےگور و کفن پَٹ و بازار تیٹ بےشرفی ئٹ خسّرہ۔ بلوچ راج پین راج ئسے آ زورئٹ کوزہ کتنے او تینا ہمسائے تون امن ئٹ رہینگنگ خواہیک ولے کوزہ گیراتا ظلم و تادی بلوچ راج ئے بھلو جنگ ئسے آ درینے۔ بلوچ امن ئٹ رہینگوکو راج ئسے او جنگ ئے چھٹفنگ نا کُلو تیک و جنگ خواہپک ولے کوزہ گیراتا زوراکی و لُٹ و پُل ئے بیرہ جنگ ئنا وسپہ ئٹ ایسر کننگک۔
