بلوچ نیشنل مومنٹ نا مسکوہی جنرل سیکرٹری و بلوچ سروک رحیم بلوچ ایڈووکیٹ چاگڑدی حوالکاری میڈیا غا اسہ پوسٹ ئس کرسا پارے کہ وائس فار بلوچ مسنگ پرسنز (وی بی ایم پی) نا بین برانزی کیمپ ئے ہُشنگ پاکستان نا کوزہ گیر لشکر نا اسہ پین فسطائی کارروائی ئس ءِ۔ دا وی بی ایم پی کیمپ خُڑکیکا 15 سال مُست کوئٹہ پریس کلب نا ماڑی نا مونا اڈ تننگاسس و حکومت نا سخت دباؤ آن پد ہم بیگواہ کننگوک بندغ آتا آجوئی کن اینو اسکان برجاء ءِ۔
او پارے کہ دا اولیکو وار اف کہ ڈھکوک ایجنسیک وی بی ایم پی نا کیمپ ئے خاخر تسنو، بلکہ دا تدینی آن مُست وی بی ایم پی نا کیمپ آ پاکستان نا سیکیورٹی لشکر و اوفتا ایجنٹ آتا کنڈ آن کیہی وار جلہو مسنے و خاخر تننگانے۔ بی وائی سی، وی بی ایم پی، بلوچ خوانندہ و بلوچ الس ئنا برخلاف دا وڑ ئنا چم بازی کاریم ئٹ ہتنگ کوزہ گیر ریاست پاکستان و اونا سیکورٹی لشکر نا مایوسی ئے پھاش کیک۔
او پارے کہ پاکستان نا استعماری حکومت و اونا لشکر ئے خبر مرے کہ او دننگا بے بندغی چم بازی کارمرز کرسا الس ئنا عزم، جہد و توار ئے توننگ کپسہ۔ بلکہ داسا ظاہر ءِ کہ بلوچ الس ہر نہاد آ بلوچستان آ پاکستان نا کوزہ آن پیشتمنگ کن پرعزم ءِ۔ زوراکی نا بیگواہی و ایلو بندغی حق آتا لتاڑ تون اوار بلوچ زنک کشی نا برخلاف بلوچ آتا توار انداخس سوگو مسنے کہ ریاست یا ریاست نا سرپرستی ٹی چلوکا ٹولی تا ذریعت ئٹ اوفتِہ توننگ منکن اف۔ ریاست نا بیدادی، دباؤ و پروپیگنڈہ ہر وار بندغی حق آتا لتاڑ نا برخلاف بلوچ مزاحمت تون اوار بلوچ قوم ئنا جہد آجوئی ئے توننگ ئٹ بے سوب مسنے۔
بلوچ سروک پارے کہ بندغی حق آتا کارکن ماہ رنگ بلوچ نا برخلاف پاکستان نا دا زوت ئنا دروغ ئنا مہم و وی بی ایم پی نا کیمپ ئے ہُشنگ ہم بلوچ جہد ئے نزور کننگ نا اسہ پین بےسوب کوشست ئس ءِ۔
