خاران شار ئٹی اینو سُہب ئنا وختا کوزہ گیر ایف سی و ڈھکوک ادارہ غا تا کارندہ و ہندی مخبر آتا کُمک ئٹ خاران شار ٹی ساڑی سید نور احمد جان مسجد و شیخ مسجد محلہ نا نیامیکو خلق آتیٹی لشکر کشی کریر۔
ہندی بندغ آتا رِد ئٹ کم ئس کم پانزدہ لاری تا پاکستانی لشکر نا کاروان مخبر آتا کُمک ئٹ چادر و چھار دیوالی نا شرف ئے لتاڑِسہ کیہی اُرا تے پٹار و علاقہ ٹی ڈرون کیمرہ آتا سرویلنس ئے ہم کریر۔
حوال تا رِد ئٹ ڈیتھ اسکواڈ نا کارندہ ناصر عرف غوسو تینا ٹولی تون کوزہ گیر لشکر تون اوار اس۔ لشکر کشی ٹی بشخ ہلِسہ ملا ناصر تینٹ مہالو سُم کاری کننگ آن گُڈ سُہب ئنا لشکر ئے لشکر کشی کِن ہیسُنے۔
یات مرے کہ مُلا ناصر ہند ئٹی دُزی، مخبری و داڑیلی کیک۔ مُلا ناصر نا الِہ مار حافظ احمد سلاہ بند تنظیم آتا جلہو ئسیٹی خلنگاسس۔ ملا ناصر علاقہ ئی مخبری تون اوار ایلو چاگڑدی گندئی تیٹی اوار ءِ۔
ملا ناصر ڈھکوک ادارہ غاتا کُمک ئٹ چاگڑدی گندئی تیٹی اوار اسِہ سلاہ بند و گینگ ئسے نا بھلا ءِ۔ ہرا علاقہ ٹی دُزی، داڑیلی و منشیات، بھتہ خوری ٹی اوار ءِ۔
ملا ناصر نا تین پہ تینی دشمنی و جیڑہ غا تا سوب آن کیہی بندغ آتے زورانسری بیگواہ کننگانے۔
