وائس فار بلوچ مسنگ پرسنز نا بین برانزی کیمپ ئے 5623 دے مس، نوشکی آن تعلقداری تخوک سیاسی و چاگڑدی جہدکار نور محمد جمالدینی، فیاض احمد بادینی و الہی بخش مینگل کیمپ آ بسر و اواری نا درشانی کریر۔
وی بی ایم پی نا وائس چیئرمین ماما قدیر بلوچ پارے کہ دنیا ٹی بھاز آ بندغ آک بسر و ہنار ولے او غُٹ آن جتا و زندہ ءُ نشانی ہمو تخرہ ہرا تینا زند ئے اسہ بھلو مسخت ئسے تون تفرہ، تاریخ دہنا ہمتی آ و سرباز آ ورناتا جہد آن پُھر ءِ، ہرا لمہ وطن نا آجوئی و بقا نا فکر ئے زندہ تخنگ کن لمہ وطن نا خُمب ئٹی خاچار۔ لمہ وطن نا دا دلیر آ ورنا تیکن ہر سال ئنا وڑ دا وار آ ہم سینزدہ نومبر ئے شہید آتا دے ئنا پِن ئٹ منائفنگو، شہید آتا بین برانزی کیمپ ئٹی چھار بجہ آ شہید آتا یات ئٹی چراغ روشن کننگو و اوفتہ دروت ندر کننگو۔ بندغی حق آتا ادارہ آک، وکیل آک و غُٹ مخلوق تون اوار شہید آتا و بیگواہ غا بندغ آتا خاہوت آتان خواست ءِ کہ او شہید آتِہ دروت ندر کننگ کن بریر بشخ ہلیر۔
ماما قدیر بلوچ مُستی پارے کہ شہید آتا کفن ئٹی خاچوک چہرہ آتا تسلی و بشخندہ دا ہیت ئنا پھاشی ءِ کہ او تینا لمہ وطن نا مون آ سرسوب مسنو۔ و غُٹ بلوچ ورنا تیکن ہندا کُلہو ئے الانو کہ بیرہ لوزآتیٹ نہ بلکہ ننے عملی جہد کروئی تمّو۔ راج ئنا ہر بندغ ئے تینا زمہ واری ئے پُہہ مرسہ اُست ئنا سِخت ئٹ جہد کروئی تمّو۔ تینا جند ئنا شونق آتہ الّسہ بیرہ لمہ وطن کن نن ءَ دے ئے اسٹ کروئی مرو۔ بلوچ راج ئنا بقا نا جنگ گُڈیکو دم اسکان برجا تخوئی مرو۔ ہرا اسہ بھلو مسخت ئسے کن ندر مریرہ او اسُل کھسپسہ، اوفتا زند، اوفتا فکر بروکا پیڑی تیکن کسر نا چراغ ءُ۔
