(گودی حمیدہ بلوچ نا گُڈیکو کُلہوّ نا براہوئی مَٹ)
نوشت: حمیدہ بلوچ| مٹ: پھلین بلوچ
نن زگری اُن یا مسلمان دا الّمی اف ولے نن مِہر گُلزمین تون کینہ۔ تینا جند ئنا ڈغار آ عبادت نا جاگہ غاکو۔ سُجدہ نا جاگہ غاک چلتن آن بناء مرسا آماچ، زندان، نرمُک، دشت پلیجی، دشت کوگدان، دڑامب، سیاہجی، شاشان، ہلوائی، کھیر تھر، ھربوئی، کوہ سلیمان، کوہ باتیل، کوہ مہدی و کوہ مُراد اسکان و ہلمند آن الیس مکُران (چھابہار)، قصرقند، دشتیاری، سرباز، نیکشہر، پشین مند و بلیدہ اسکان بُڑز، زیبا و گنوکی ءُ زباد نا گند ئتون تفوک ءُ۔ نن دا بُوچ و پَن آتا مِہر ئٹ خُلّوک اُن ہرا کہ کوہ مارّان آن الیس بولان، سنی شوران و ڈیرہ غازی خان اسکان اریر۔ نن دا رَخت آتیکن مِہر بشخینہ ہراکہ ماراپ آن الیس ماشکیل و ہلمند اسکان بلوچ ڈغار نا سیم تتون تفوک ءُ۔ نن دا زیبا غا ریک و پُلک آتا عاشق اُن ہرا کہ دالبندین آن الیس کھیر تھر و سندھ ئنا دریاب اسکان تینا زباد ئے تالان کننگ ءُ۔ نن تینا دریاب تون اُست ئنا کُرمبی ئٹ مِہر کینہ ہرا کہ اسہ باوّہ ئسے نا دروشُم ئٹ تینا سیخا ئے ننا کاٹُم آ تخِسہ، مکُران آن الیس ٹھھٹہ اسکان ننا بےمٹ آ دہیاڑ ئے درشان کرسا ءِ۔!
نن امو زیبا تتون گنڈوک اُن ہرا کہ دا ڈغار نا کُنڈ کُنڈ آن وار وار آ سوگوہی و جیرت ئتون تینا ”مِہر“ ئنا رَکھ ئکن ہَر ویل ئتون مون تننگ کن مُدام سَلوک ءُ۔
نن ہمو سُجدہ نا جاگہ کِن گنوک اُن ہراڑے کنا جغر نا ٹُکُر، کنا ایلُم میرل ”میرک“ سُجدہ کرینے۔ او ننا گچین و سوبّر آ سنگت اسّک۔ میرک داسہ روح ئس جوڑ مس۔ لُمہ داسہ صغیر کِن فریشان مریکک۔ میرک تو مُدامی کِن سلیسَک۔ ہرا شادکامی ئٹ کہ میرک ئے رُخصت کننگ اسُرہ، ای اَم امو شرف ئنا خواہندار اُٹ۔ ای ایہُنو مرگ ئس خواہپرہ، کنے یکہ کہوئی اف بلکہ کنا کہینگ آ کنے شرف تننگِہ و کنا مرگ آ شادکامیک مریر۔ شاد و گل ئٹ ای مِزل نا کنڈ آ روان مریو، ولے ”نُگراہ“ و ”زگرین“ کنا زند ئنا بشخ ءُ۔ ای امر کیوّ، ہرا فیصلہ کنا حق ئٹی ءِ و ارا کنا چُناتا حق ئٹی ءِ و اراسِٹ کنا راج ئتون تفوک ءِ۔
ای ویل ئسے نا پلویڑ ئٹی اُٹ، اسہ لُمہ ئس مرسا تینا اڑتُما چُنا تیان گر جِتا مریوّ گُڑا اوفک چوری پاننگِرہ۔ چوری تا حالیت کنا مون آٹے۔ ای صغیر ئے امر تنیا اِلیو، صغیر داسہ اَم نن ئنا پاس آتیا بش مریک و چیہانٹ خلِسہ پائک کہ کنے دڑد تِفہبو، ای تو دا ڈغار تون یکہ مہر کرینُٹ، گواچنی ئٹ مِہر کروکا تو میرک اس، امو میرک ہرادے لُمہ اسہ ساہت ئس اَم تینے آن مُر کننگ کتوکہ، امو میرک سُجدہ کرِسہ تینا مُدامی آ مہر ئے دُوئی کننگ کِن جون ئنا دروشُم ئٹ (جسمانی) نن تون اف ولے!
ای ہراتم کہ کولواہ غا کاوہ گُڑا اسہ کُوکار ئس بریک و مَش تیٹی پِنِسہ کیک کہ، داسہ برک نن تون اوڑدہ مر، نن نا وڑ اِنگا لال آتون مِلنگ کِن بیقرار اُن۔ میرک اندا مَش تا چُنا اس۔ مشکے گجّلی آن نوکجو میہی اسکان شپّاد آ نتّ تون سفر کریکہ بلکہ او تو باضو اَر دامن ئے دُروت ہلنگ نا اُست خواہی تخاکہ، اخس کہ مِہر کروئی اس کرے و داسہ روح ئنا وار ءِ، روح بیقرار مریک جون ئتون اوار مننگ کِن ولے داکان اَم گیشتر شادکامی سرسوب آ مرگ کن مریک۔ نی اَم برک ولے صغیر پیر اِنگا لُمہ، حمیدہ زگرین و نُگراہ کِن ارٹمیکو زند ئے تدیفنگ ءِ، امر کین اندا تو زند ءِ۔!
ای دا لُمہ ئے امر تنیا اِلیوّ کہ ہرا میرک نا وڑو لال ئس ودی کرے، دُنو لال چندی تیٹی اسِٹ ئس مریک۔ دُن انگا لال آتا لُمہ غاتیکن ندّر مریوّ کہ تینا پِڈ آتیٹی نُہہ تُو اسکان دا دلیر آتے تخیرہ۔
ای فلسفہ چاؤک ئس افٹ کہ خیربخش مری ئےچِرِک آتیٹی بال ایتوّ و پدا بریو تینا زند ئے تدیفنگ بناء کیو۔ ای حمیدہ اُٹ صغیر، میرک نا اِیڑ، میرک اسہ عمل کروکو سپاہی ئس اسک۔ کنے دا سنگت تون اوّار مروئی ئس و ای مننگ کتوّٹ ولے ای اَم عملی پِڑ آ عمل کرِسہ تینا بشخ ئنا کاریم ئے کریٹ۔ ای گواچن ئٹ داسہ ودی مننگ کِن ہننگ اُٹ، کنتون گر اوڑدہ مننگ نا اُست خواہی مس گُڑا اندا مَش تا سنگتی ئے ارفِسَک، ہراکہ میرک نا کسر اس۔ ای تینٹ دا پاپرہ کہ کنے مُدام سلوکا مِہر دُوئی مریک یا آخہ ولے ہرا خاخر کہ کنا پِڈ ئٹی روتہ خلنگ ءِ، او اسہ دے نہ دے ئس کنے جون ئنا دروشُم ئٹ (جسمانی) نُمے آن جِتا کیک۔ داسہ نُگراہ و زگرین تینا اِلہ تون کانفرنس کال آ اوّار مننگ کپرور ولے پنچ سال مہالو نُگراہ و زگرین نا خیالداری نا زمہ واری ئے اودے تِسونُٹ۔
ای ہِننگ ئٹی اُٹ، کنے داسہ داکان کسّس توننگ کپک۔ کنے امو گواچن آ لُمہ نا خُمب ئٹی کاٹُم تِخِسہ، تینا مُچا گِلہ غاتے مُر کروئی ءِ، ہرا نا پِڈ ئٹی میرک تون اوار ننا ایلو جغر نا ٹُکُر آکو۔ لُمہ جان، صغیر جان، نُگراہ و زگرین جان تینا خیالداری ئے کیرے۔ ای داسہ امو دامن ئٹی ہِننگ اُٹ ولے تختی و قلم نا سنگتی ئے اَم ہچبر اِلپیرے، دا ام اسہ سِلاہ/ تُوفک ئس ءِ۔ ای و میرک (ہنینا ایلم و سنگت) ہراڑے تُوسُنن داڑے اسہ تختی ئس ام ارے۔ نُم کُل دا تختی نا سنگتی ئے اسُل الپیرے۔ ای امو نیمہ غا گام خلِنگ ئُٹ کہ ہراکان جون ئنا دروشُم ئٹ پدا ہچ بننگ اف ولے کنا روح آواران تون اوار مُچا گُلزمین ئٹ گون مریک۔ ای تینا مُستی نا جُہد ئے میرک و ایلو سنگت آتون اوار بناء کیوہ۔
سلامتی نُم کِن، نُما ہنینا حمیدہ بلوچ
