بلوچستان نا ضلع پنجگور نا جہہ چتکان آن بیگواہ کننگوک ورنا ڈگری کالج پنجگور نا چوکیدار ارشاد احمد (باوہ نا پِن صوفی محمد اسماعیل) نا خاہوت و سیال آک غلام نبی، باھند شاکر اسماعیل، لالہ داؤد خالد موسی تینا جاگہ آ پریس کانفرنس تون تران کرسا پاریر کہ ارشا احمد اَسہ پر ایمنو شاری ئس ءِ، تُدوکا کیہی دے تیان او بیگواہ ءِ اونا خاہوت ڈکھ و فریشانی ٹی ءِ۔
او کل ادارہ ضلعی انتظامیہ پولیس، سیاسی جماعت، عالم آ تیان خواست کریر کہ او ارشاد احمد نا آجوئی کن تینا کڑد ئے ادا کیر۔
او پاریر کہ ارشاد احمد ڈگری کالج پنجگور ئٹی چوکیدار ءِ و شریفو بندغ ئس ءِ او کالج ئٹی تینا ڈیوٹی تننگ آن بیدس پین ہچ کاریم کپک، او اُرا غان کالج و کالج آن اُرا غا بسکہ، ولے تُدوکا دے منہ سلاہ بند لاری ٹی تولوک بندغ آک بیدس سوب آن اودے بیگواہ کرسا تینتو اوار دریر کیہی دے گدرینگ آن پد ہم اونا ہچ خبر اف، ہرانا سوب آن اونا خاہوت بھاز فریشان ءِ۔
او پاریر کہ ننا کس ئتون ہچو دشمنی ئس یا ہڷ ءَ تِس ئس اف و نئے ارشاد احمد بےقانودی کاریم تیٹ اوار ءِ۔ اگہ کس ئتون ہڷ ءَ تس یا دشمنی ئس ارے گڑا او خاہوت تون حوال کیر۔
او کل سرکاری ادارہ، ضلعی انتظامیہ آن خواست کریر کہ ارشاد احمد نا اجوئی کن بندغی ہمدڑدی نا بنیات آ تینا کڑد ءِ ادا کیر داکان بیدس او ہند ئنا معتبر عالم آتیان خواست کریر کہ ننا ورنا ارشاد احمد نا آجوئی کن ڈکھیائی آ خاہوت تون کُمک کیر نن تینا وس ئنا کچ ئٹ ہر وڑ کوشست کرین ولے بےسوب مسن ننا خواست ءِ کہ بیگواہ غا ارشاد احمد ئے آجو کرسا اونا خاہوت نا بے جاراتی ئے ایسر کیر۔
او پاریر کہ اگہ 48 ساعت ئٹی ارشاد احمد ئے آجو کننگتو گُڑا نن سی پیک کسر آ برانز کرون۔
