بلوچستاب لبریشن فرنٹ نا ترجمان میجر گہرام بلوچ تینا شنگ کروک بیان ئٹ پارے کہ سرمچارک بارکھان نا ہند جاندران مش ئٹی موبائل ٹاور و مشین تِہ ہشار و مستونگ کھڈ کوچہ ٹی لیویز کارندہ غا تا سلاہ تِہ پُھلار۔
او پارے کہ 23 اکتوبر آ سرمچارک شام ئنا ہفت بجہ غا بارکھان نا ہند بیبرٹک جاندران مش ئٹی خلوک یوفون ٹاور و اونا مشین تِہ سُمکاری کرسا ہُشار۔
اونا پاننگ اس کہ ایلو کاروائی 28 اکتوبر نیمروچ نا یک بجہ غا مستونگ کھڈ کوچہ ٹی گشت ئنا وختا لیویز کارندہ غا تا سلاہ تِہ پھلنگ آن پد بندغی و بلوچیت نا خاطر ئٹ اوفتِہ یلہ کریر۔
ترجمان پارے کہ بلوچستان نا جتا و محدود علاقہ تیٹی گیشتر ٹاور خلنگ بلوچ سرمچار تا کاریم و ہن ءَ بر ئے مونیٹر کننگ کن ءِ۔ بیست و یکمیکو کرن(صدی) نا دور ئٹی بلوچ سرمچارک کم وسائل کاریم ئٹ ہتِسہ ریاستی ڈٹ تِہ ٹک کننگ ءُ ہرا سرمچار تا سرسوبی نا ثبوت ءِ۔
اونا ودیک پاننگ اس کہ لیویز و پولیس فورس نا حاضر سروس بلوچ کارندہ غا تِہ نن وار وار پارینن کہ بلوچ سرمچار تا رند ئٹ بننگ، اوفتا کسر تِہ بند کننگ و بلوچ اُلس ئنا برخلاف کوزہ گیر ریاست نا لشکر و ڈکھکوک ادارہ غا تا ظلم و زوراکی ٹی اوار مرسا ریاستی مشینری تِہ ایندھن تننگ آن پہریز کیر ہلہ آنہہ گُڑا بی ایل ایف لیویز و پولیس ئے ہم ہندن ٹک کرو ہرا وڑ پاکستان نا زوراک آ لشکر، ڈکھکوک ادارہ و اوفتا ہندی کمکار و دلار آ تِہ ٹک کیک۔
میجر گہرام پارے کہ کوزہ گیر ریاست نا توفنک اونا زوراکی تا پیدواری ءِ و ہندی بندغ آتا دوٹی توفنک ترسا اوفک دا تاثر ئے تننگ خواہرہ کہ اوفتا کالونیل زوراکی و تادی تِہ ہندی بندغ آتا مُخ تفی تُد ءِ۔ ہندا ہندی توفنکی آتِہ اوفک بلوچ زنک کُشی کن کارمرز کیرہ و اوفتا زریعت ئٹ تینا کوزہ ئے برجاء تخرہ۔
اونا ودیک پاننگ اس کہ نن ہچ وڑ ئٹ کس ئسے دا موکل تفنہ کہ اوفک روزگار یا ڈیوٹی نا پن ئٹ بلوچ سرزمین آ کوزہ گیر نا کمکار مرسا اونا تروکا توفنک نا مون ئے سرمچار یا بلوچ الس ئنا پاسوئی کیر۔ اینو اسہ وار ئس پدا نن تینا ڈغار نا بھاتی تِہ پانہ کہ اوفک ریاست نا تروکا توفنک ئے بلوچ راج و بندغی نا برخلاف کاریم ئٹ ہتنگ نا جاگہ غا تینا راج و بندغی کن جوانو کڑد ئس ادا کیر۔
او پارے کہ بی ایل ایف بلوچ راج ئے باور تننگ خواہک کہ بلوچ نسل کشی ٹی اوار ریاست و دا ریاست تون اوار انگا کُل ڈوہدار تیان حساب ہلنگ مرو۔
ترجمان ایسر ئٹ پارے کہ بلوچستان لبریشن فرنٹ تومکا کاروائی تا زمہ واری ئے ہرفک و دا قول ئے کیک کہ بلوچستان نا آجوئی اِسکان کوزہ گیر لشکر و اونا شریکدار تِہ ٹک کرسا کرو۔
