ڈیرہ اسماعیل خان ئٹی ایف سی چیک پوسٹ آ سلاہ بند بندغ آتا جلہو ئٹی دہ کارندہ خلنگا و کیہیک ٹپی مسُر۔
خیبر پختونخواہ نا ضلع ڈیرہ اسماعیل خان ئٹی سیکیورٹی لشکر نا اسہ چیک پوسٹ آ جلہو ئٹی کم آن کم 10 کارندہ خلنگانے و کیہیک ٹپی مسنو۔
ڈی آئی خان و سول انتظامی واکدار تا رد ئٹ سلاہ بند بندغ آک پنچ شمبے نا شام تحصیل درازندہ ٹی فرنٹیئر کانسٹیبلری (ایف سی) نا زام چیک پوسٹ ئے ٹک کریر۔ چیک پوسٹ ئٹی ایف سی محسود اسکاؤٹس نا کارندہ آک اسُر۔
پولیس نا پاننگ ءِ جلہوکار تا جلہو ہندن سخت اسک کہ کارندہ آک ہمو جاگہ آ خلنگار۔ خلنگ مروکا تیٹی اسہ جونیئر کمیشن افسر ئس ہم تُد اسک۔
جلہو ئٹی ٹپی مروکا تا بابت ئٹ دائسکان پکؤ حوال اف ولے کالخواک دائسکان مُسہ کارندہ تا ٹپی مروکاتا پن تے پارینو۔
ہندی بندغ آتا پاننگءِ کہ زام چیک پوسٹ امن میلہ گرائونڈ نا ہند ئٹیءِ۔
پاکستانی لشکری کالخواک مُدامی نا وڑ تینا لشکری کارندہ تا نسخان تا بابت ئٹ بے توارءُ۔
