کراچی پریس کلب نا مونا بلوچ یکجہتی کمیٹی نا باسک آتیا پولیس بیدادی کرسا بی وائی سی کراچی نا آرگنائزر لالا وہاب بلوچ و ایلوفتہ دزگیر کرے۔
بلوچ یکجہتی کمیٹی نا کنڈ آن کراچی پریس کلب نا مونا اڈ ہلوک برانزی ریلی آ سندھ پولیس ارش کرے، پولیس کیہی برانزی تیا بےدادی کرسا دزگیر کرے۔
پولیس پریس کلب نا دامون ہیمون بھلو کچ ئسیٹی کارندہ سلیفے و پریس کلب آ بروکا کسر تہ بند کرے و بلوچ یکجہتی کمیٹی کراچی نا آرگنائزر لالا وہاب بلوچ و ایلوفتہ دزگیر کرے۔
خیال ئٹ مرے کہ درو بلوچ یکجہتی کمیٹی کراچی تون اوار تیبہ بلوچستان ئٹی زوراکی نا بیگواہی تا ودوکا کیس و برجاء تُو ئٹی 60 آن زیات بندغ زوراکی ئٹ بیگواہ کننگ نا برخلاف برانزی تحریک بناء کننگ نا پڑو کریسس و اینو کراچی آن ہمودے بناء مروئی اس۔
بلوچ یکجہتی کمیٹی نا ترجمان نا کنڈ آن بیان ئس شنگ کننگا ہراٹی او پارے کہ سندھ حکومت نا کنڈ آن ننا پرایمن برانزی تیا پولیس گردی نا درشانی کننگا و کیہی بندغ آتِہ دزگیر کننگانے۔
ترجمان پارے کہ ایمنی ئٹ برانز کننگ ننا راہبندی و قانودی حق ءِ ولے حکومتی ادارہ غا تا کنڈ آن جمہوری عمل ئے لتاڑنگ مسنے۔
ترجمان خواست کرے کہ پرایمن برانزی تِہ یلہ کننگِہ نہ تو برانز ئے پین تالان کرون ہرا نا ذمہ واری حکومتی ادارہ تیا مرو۔
