پشتون تحفظ موومنٹ نا سروک منظور پشتین پارینے کہ وادی تیراہ زخہ خیل پیر میلہ بازار آ پاکستانی بالی جلہو ئٹی لس الس ٹپی مسنے۔ ٹپی مروکا تیٹ چُنک سن بندغ ہم اوار ءِ۔
او پارے کہ ٹپی مروکا تِہ حیات آباد میڈیکل کمپلیکس پشاور آ سر کننگانے۔
اونا پاننگ اس کہ پشتون بیلٹ ئٹی جنگی پالیسی تیا عمل کننگ ئٹی چرجوئی ئٹ بے سوبی آن پد ریاست السی جہہ تیا جلہو بناء کرینے۔
منظور پشتین پارے کہ ہخس زور خلوئی ءِ خلبو ولے نن پشتون وطن آ ڈالری جنگ آتِہ مننگ کن الوفن۔
اندن پشتون قومی جرگہ نا کنڈ آن ایکس آ بیان ئس شنگ کرسا پاننگا کہ تیراہ ٹی فوجی ڈرون جلہو تیٹ 12 چُنا و 13 بھلو ٹپی مسنو، ولے خیبر سیکورٹی لشکر نا پاننگ ءِ کہ او ٹی ٹی پی نا بندغ ٹپی کرینو۔
او پاریر کہ گواچن دادے کہ دا عکس آک سلاہ بند طالبان تا افس بلکن چُنا تا ءُ، و دا چُناک ہم تینا اُرا تیٹ ٹپی مسنو۔ دا نا مطلب دادے کہ بمباری اُرا و السی جہہ تیا کننگانے۔
او پاریر کہ مشر منظور پشتین و ایلو پشتون سروک آک دا گوازی ءِ سرپند مریرہ، اندنی آن او تومکا فریق آتِہ پاریر کہ نُما دروغ ئنا جنگ ئٹی پشتون آک خلنگ مننگ ءُ، اندا سوب آن تومکا فریق آک ننا ڈغار آن پیشتمر تاکہ داڑے امن مرے۔
