اوغانستان ٹی برجا انگا پِر و ھار آ تیان بیران مروکا تہ کچ چار سد آن خُڑک سر مس ۔
ہنوکا ہفتہ ٹی پِر و ھار تہ سوب آن اوغانستان نا شمالی ہند ٹی 300 آن زیات بندغ آک بیران مسُر ، پوسکن انگا حوال آتا رد ئٹ ہفتاد بندغ پین ہم بیران مسنو ۔
اقوام متحدہ نا عالمی ادارہ برائے خواراک نا پاننگ ءِ کہ ھار آن سئے سد آن زیات بندغ کھسکُنو اِرا ہزار اُرا بُھس مسونے، شمالی اوغان صوبہ بغلان نا پنچ ضلع متاثر مسُنو ۔ کہوک آتا کچ گیش مننگ نا خُلیسءِ۔
سیلاب آن بدخشان،غور و دے کہیلنگ ہرات و ایلو صوبہ آک متاثر مسُنو۔ اوغانستان نا تہی بشخ آ تیا داسا نا پِر و ھار آتا سوب آن پین ہفتاد بندغ کھسکُنو ۔
صوبہ غور نا انفارمیشن ڈیپارٹمنٹ نا بھلا مولوی عبدحئی زعیم پارینے کہ جمعہ 17 مئی آ بناء مروکا پِر و ھار ئنا دیر تہ سوب آن اِرا ہزار اُراتے نسخان رسینگانے ۔
صوبائی ہندی صدر فیروز کوہ ٹی اِرا ہزار دکان دِیر ئٹی بڈینگانو۔ زعیم نا رد ئٹ دائسکان ٹپی مروکا آتا کچ ننے خبر مننگ کتنے نسخان آتا سوب آن ننا او ہند آتیٹی رسائی متنے ۔
شمالی اوغانستان ٹی ہنوکا ہفتہ بھاز پِر و ھار تہ لڑ بناء مسس ۔ ھار تیان 315 بندغ کھسکُر و شانزدہ سد آن زیات بندغ ٹپی مس اسُر ۔ کُل آن زیات تباہی بغلان، بدخشاں،ہرات و غور صوبہ ٹی مسس ۔اوغان ائیر فورس نا ہیلی کاپٹر کمک کننگ نا وخت چار شمبے نا دے تمیسہ بھُس مسس دا ویل ئٹی اسہ بندغ ئس کھسکس و دوانزدہ بندغ ٹپی مس اسُر ۔اقوام متحدہ نا سکریٹری جنرل انٹونیو گوٹیریش اوغانستان ٹی بھلو کچ ئسے آ مروکا جانی نسخان آتا تعزیت نا اظہار کرے و زوت کُمک تننگ نا پارے۔
او جہانی مخلوق آن مصیبت نا دا وخت آ اوغانستان نا کمک کننگ نا خواست کرینے ۔
