اینو کراچی ٹی برانز نا وختا پولیس نا بیدادی و دزگیری آن گڈ بلوچ یکجہتی کمیٹی نا ڈپٹی آرگنائزر لالا وہاب پین چھار بندغ تون اوار تھانہ غان بیگواہ کننگانو۔
دا رد ئٹ بی وائے سی تینا اسہ بیان ئس شنگ کرسا پارینے کہ اینو کراچی پولیس بلوچ یکجہتی کمیٹی نا بنجائی ڈپٹی آرگنائزر لالا وہاب بلوچ، سیف بلوچ، عطاء اللہ بلوچ، بابل بلوچ و آفتاب ئے دزگیر کریسس۔ اوفتِہ آرٹلری میدان پولیس اسٹیشن صدر آ دننگاسس و اوفتا سیال آتِہ پاننگاسس کہ اوفتا برخلاف ایف آر کننگانے۔
ترجمان پارے کہ ولے پولیس ایف آئی آر ئے نشان تننگ اف و بی وائے سی نا باسک و خاہوت نا رد ئٹ او لالا وہاب ئے شش بجہ غا خناسر و ہشت بجہ غان گڈ اوڑتون اوڑدئی کن کس ئے الیتور۔
اونا ودیک پاننگ اس کہ اندن لگیک کہ او پولیس تھانہ ٹی افس و اوفتِہ زوراکی ئٹ بیگواہ کننگانے و اوفتا زند خطرہ ٹی ءِ۔ اگہ اوفتِہ گڑاس مس تو دا نا ذمہ وار سندھ پولیس و ریاست مرو۔
داکان مُست بلوچ یکجہتی کمیٹی نا بنجائی آرگنائزر ڈاکٹر ماہ رنگ بلوچ و وائس فار بلوچ مسنگ پرسنز نا سروک سمی دین بلوچ کراچی ٹی برانزی تیا بیدای، لٹ کُٹ و دزگیری تا بارت ئٹ ایکس (ٹویٹر) آ تینا خیال آتا درشانی کریسر۔
سمی دین بلوچ پارے کہ بی وائی سی نا راہشون لالا وہاب بلوچ ئے پین کیہی سنگت تون اوار پولیس لٹ کُٹ کرسہ دزگیر کرینے۔
اونا پاننگ کہ بلوچ نیاڑی تہ سندھ پولیس اسہ وار ولدا لٹ کُٹ کرینے، ننے پولیس نا نرینہ کارندہ غال کھرینگ تسنو۔ بلوچ دشمنی ٹی غُٹ سیاسی بنجائی تپہ غاک تینا مچّا ریاستی کمک تون پھاش مننگ ئٹی ءُ۔
او پارے کہ ننا ڈوہ ہندادے کہ نن ریاستی زوراکی آ چُپ تولپنہ، زوراکی ئٹ بیگواہ کننگوک بندغ آتا آجوئی نا خواست آن پِزیر مفنہ۔
سمی دین بلوچ بلاول بھٹو زرداری نا پِن ئٹ پارے کہ او سیاسی راہشون ئسے آن زیات بلوچ آتیک ظالم ئسے نا کڑد ئے سر تننگ ئٹی ءِ۔
ڈاکٹر ماہ رنگ بلوچ پارے کہ اسہ وار ولدا پاکستان نا ایجنسیک، سندھ پولیس و پیپلز پارٹی نا صوبائی حکومت زوراکی کرسہ بیگواہی تا برخلاف ایمنی ئٹ مروکا برانز ئے ایسر کننگ کن کراچی آن بی وائے سی نا ڈپٹی آرگنائزر لالا وہاب بلوچ و ایلو سنگتاتہ دزگیر کرینو درینو۔ خیال آتا درشانی آ دا وڑ ئنا گھام ہفّنگ زوراکی نا گندَہئو دروشم ئس ءِ۔
اندن ڈاکٹر ماہ رنگ بلوچ پارے کہ برجاء غا ہفتہ غا تیٹ کیہی بلوچ خاص وڑئٹ خوانندہ آتہ بلوچستان و کراچی آن زوراکی ئٹ بیگواہ کننگانے۔ ہندن زوراکی نا بیگواہی و بلوچستان ئٹی مروکا بندغی حق آتا لتاڑ آ توار ہفّوکا تِہ زوراکی ئٹ چُپ کرفنگک۔
او مُستی پارے کہ بندغی حق آتا تنظیم آتہ شہری آزاتی آ دا زوراکا جلہو آ نظر شاغوئی ءِ۔
