بی ایس او نا مسکوہی چئیرمین و بی این ایم نا مسکوہی سیکریٹری جنرل رحیم بلوچ ایڈوکیٹ تینا شنگ کروک اسہ بیان ئسیٹی پارے کہ بلوچ راج ئنا برخلاف کوزہ گیر پاکستان تینا ریاستی زوراکی و استبداد ئٹی ہڑدے ودکی کننگ ءِ۔ بلوچ فرزند آک کیہی دہک آن زوراکی ئٹ بیگواہ کننگ مننگ ءُ۔ بندغ آک دہ دہ، پانزدہ پانزدہ سال آن بیگواہ ءُ۔
او پارے کہ تدوکا منَہ دے ئٹی کیہی بلوچ ورنا، خاص وڑ ئٹ اسٹوڈنٹ آتہ نہ بیرہ کراچی و پنجاب نا جتا کیمپس تیان ہرفِسہ بیگواہ کرینو بلکہ گوادر، کیچ، خضدار تون اوار بلوچستان نا کنڈ کنڈ آن ہم بھلو کچ ئسیٹی بندغ آک زوراکی ئٹ بیگواہ کننگانو۔ بلوچ خوانندہ غا تتون کراچی و پنجاب نا خواننگ جاہ تیٹ راجی، ڈومیسائل، زبان، پوشاخ و دود ربیدہ نا بنداو آ امتیازی سلوک کننگک و اوفتِہ ہر جاگہ غا دشمن کون آ روشت نا گواچی کننگک۔
اونا پاننگ اس کہ تدوکا دے تیٹ ڈیرہ بگٹی و سوئی ٹی اسہ بھلو لشکر کشی ئس کرسا بلوچ آتا اُرا تِہ، مال و مڈی تِہ بمباری کرسا بھس کننگا۔ کیہی بلوچ آتِہ شہید کننگا و لیویز ایس ایچ او تون اوار مُسہ درزن آن زیات بلوچ فرزند ئے زوراکی ئٹ بیگواہ کننگا۔
اونا ودیک پاننگ اس کہ بلوچ نہ بیرہ کوزہ مروک بلوچستان ئٹی پاکستانی ریاستی دھشتگردی تون مون تننگ ءِ بلکہ بلوچستان آن پیشن، خاص وڑ ئٹ پنجاب، کراچی و ہمسایہ ڈیہہ اوغانستان و ایران ئٹی ہم پاکستانی ڈھکوک ادارہ غاک بلوچ آتِہ کھسفنگ و زوراکی ئٹ بیگواہ کننگ ءُ۔
رحیم بلوچ ایڈوکیٹ پارے کہ 19 جولائی 2024 آ کماش بلوچ راہشون استاد واحد کمبر ئے ایران نا شار کرمان آن پاکستانی ڈھکوک ایجنسی تا ایجنٹ آک ہرفِسہ بیگواہ کریر و اونا بارو ئٹ دائسکان اونا خاہوت ئے ہچ حوال تننگ متنے و اوڑدئی نا آسراتی تننگتنے۔ استاد واحد کمبر نا بیگواہی آن اسہ تُو ئس مُست محمود لانگو ئے اوغانستان آن پاکستانی ایجنٹ آک بیگواہ کریر۔ اونا خاہوت ئے ہم اونا بارو ئٹ ہچ معلومداری تننگ متنے۔
او پارے کہ داسا تو پاکستانی ریاست زوراکی و استبداد آ پادی مسنے اونا آمریت داسا فسطائیت نا دروشم ہلکنے۔ پاکستان نا حالیت ہمو ریاست آتیان ہم بد ءِ ہرافتیکن ”بنانا ریپبلک“ نا اصطلاح کارمرز مریک۔ ودوکا معاشی بد حالی، نت آن کاٹم اسکان کرپشن، اژدھا نا وڑ پھڑَو خلوک مذہبی انتہا پسندی و عدم رواداری، دہشتگردی و فرقہ واریت وس آن تہ پیشن مننگ ءِ۔ پارلیمان، حکومت، عدلیہ و میڈیا فوج و ڈھکوک ادارہ تا دوٹی ءُ۔ سیاسی تپہ غاک فوج و ڈھکوک ادارہ آتا آشیر واد آن بیدس اقتدار ئٹ بننگ نا ٹک خلنگ ہم کپسہ۔ غٹ تپہ غاک فوج ئنا دلار جوڑ مسنو۔
بلوچ سروک رحیم بلوچ پارے کہ ہرا پن ئنا سیاسی تپہ غاک جمہوریت نا علمبردار اسر ہمو تپہ غاک بلوچ زنک کشی ٹی فوج تون کمک کننگ آن پد داسا جمہوریت نا قبر ئے خلِسہ اودے کھڈ کننگ ئٹ ہم فوج ئنا کمکار جوڑ مسنو۔ ہر کنڈ آن فسطائیت نا اوندھائی ءِ۔
اونا ودیک پاننگ اس کہ مُست تو لس گچینگاری تا بھرم تِہ مَٹینگ کن زوراکی، دڑکو، جوفہ جعلی ووٹ کاریم ئٹ ہتنگ مسکہ یا ہارس ٹریڈنگ نا ذریعت ئٹ حکومت جوڑ کننگ و بِٹنگ مسکہ داسا فوج و ڈھکوک ایجنسی تا کارندہ غاک پارلیمان نا بندغ آتِہ گچین کیرہ، ہرا باسک یا تپہ غاک دوست بتور تا اوفتا سرسوبی ئے بےسوبی ٹی بدل کیرہ۔ داڑے اسکان کہ اسہ پن ئنا قانود یا بل ئسے کن ووٹ تننگ کن ہم پارلیمان نا باسک یا اوفتا خوہوت اتِہ بیگواہ و بلیک میل کرسا بیوس کیرہ۔
او پارے کہ سینیٹر نسیمہ احسان نا سینیٹ نا مجلس ئٹ ہمر خنک خڑینکی مسر و تینا بیوسی و تینے آ دباؤ نا درشانی کرے و اونا پارٹی اونا اُرا ئے گھیرہ کننگ و اونا مار ئے بیگواہ کننگ نا ہیت ئے کرے، داڑان اندازہ خلنگ کبین اف کہ کوزہ مروک بلوچستان ئٹی لس بلوچ تون کوزہ گیر پاکستانی لشکر و سکیورٹی ادارہ غاک انت تادی کروفس۔ حالانکہ محترمہ نسیمہ نا اَرغ سید احسان شاہ کوزہ مروک بلوچستان ئٹی کوزہ گیر پاکستانی لشکر و ڈھکوک ادارہ تا ہُرے جا اسہ کمکار ئس ءِ۔
او ایسر ئٹ پارے کہ ہمر اژدھا تینا چُنا تِہ کُنیک اندن کوزہ گیر پاکستان ہم کوزہ مروک بلوچستان ئٹی چُنکا نافرمانی کمکار و سہولتکار آتِہ ذلیل کننگ ءِ انتئے کہ کالونائزر کن کوزہ مروک خطہ نا جغرافیہ، تزویراتی قدر و وسائل نا اہمیت مریک۔ اوڑے نا رہینگوکا تا ہچو اہمیت ئس مفک۔ بلوچ راج تون تینا راجی ٹیوار، شرف و زمانہ نا رفتار تون اوار شونداری کن پاکستان نا زور ئنا کوزہ آن آجوئی آن بیدس ہچو کسر اف۔
