بلوچ یکجہتی کمیٹی نا کنڈ آن شنگ کروک بیان ئٹ ترجمان پارینے کہ بی وائی سی نصیر آباد ہنکین درو چتھر و ربی نا علاقہ ٹی جانجوڑی کمک کن اسہ کیمپ ئس اڈ تس۔
او پارے کہ دا اندنو علاقہ ئس ءِ ہرا وار وار آ بروکا ہار تیان بھس کاری تتون مون ایتک۔ دا ہارک ہر سال تو بفسہ ولے ہار ئنا دیر کیہی وخت اسکان سلوک مریک، ہراڑان علاقہ ٹی جانجوڑی نا ویل آتیٹ ودکی مریک۔
ترجمان نا رد ئٹ چتھر و ربی نا کیمپ آتیان میڑوک حوال تا رد ئٹ علاقہ ٹی جانجوڑی حالیت فریشان کروک عکس ئس نشان ایتک۔ داڑے جانجوڑی کمک اسکان باقاعدہ سر مفننگ نا سوب آن چُنکا چُنکا ناجوڑیک ہم بھلن مرسا بیم ترول دروشم ہلیرہ۔
او پاریر کہ کُننگ نا گِڑا تا کاختی، نن ئنا خن تہاری، سِل ئنا ناجوڑی، دم ئنا ناجوڑیک و ہمپ ءَ لڈ نا سوب آن ذہنی ناجوڑی تا ویل آتتون مخلوق مون تننگ ءِ۔
اسہ پین پوسٹ ئسیٹی بی وائے سی نا کنڈ آن پاننگا کہ درو چھتر و ربی ٹی جانجوڑی کمک کن کیمپ خلنگا اندن اینو جھل مگسی ٹی کیمپ اڈ تننگا۔ اندن جتا علاقہ آتیٹ جانجوڑی کمک کن کیمپ خلنگ برجاء ءِ۔
او پارے کہ بی وائے سی نا کنڈ آن جتا تنظیم و ایلو بندغ آتہ، ہندی و جہانی تیبر آن بٹنگنہ کہ او بریر و دا جانجوڑی نا مہم ئٹ بشخ ہلِسہ تینا وس ئنا کچ، ہمر کننگ کننگ کیرہ بریر و جتا ویل آتا گواچی دا علاقہ آتِہ کمک کیر ہرافتِہ ریاست غرز کتنے۔
