حماس نا سروک یحییٰ سنوار اینو اسرائیل نا اسہ جلہو ئسیٹی مرگ ئنا گواچی مسنے۔
اسرائیل نا ڈنی کاریم تا وزیر کاٹز پک کرے کہ اینو غزہ ٹی اسرائیل نا کاروائی ئسیٹی حماس نا سروک یحییٰ سنوار خلنگانے۔
اسرائیل نا ڈنی کاریم تا وزیر یحیٰی سنوار نا کھسفنگ ئے ”اسرائیلی لشکر کن لشکری و اخلاقی سرسوبی“ ئس پارے۔
اسہ بیان ئسیٹ او پارے کہ ”سنوار ئے کھسفنگ“ بندی تا دمدستی آجوئی و اندنو بدلی ئسے نا گمان ودی کرو ہرا غزہ ئے اسہ پوسکنو گواچن ئسے نا پارہ غا درو ہرا حماس و ایران نا کنٹرول آن آجو مرو۔
اسرائیلی لشکر اینو اسہ بیان ئسیٹی پاریسس کہ غزہ پٹی ٹی اسہ آپریشن ئسیٹی مُسہ سلاہ بند کھسفنگانو۔ فوج دا آپریشن نا جاگہ و ودیک حوال فراوان کتنے۔
فلسطینی سلاہ بند تنظیم حماس نا پارہ غان دا رد ئٹ ہچو ردعمل مونا بتنے۔
اسرائیل نا وزیر دفاع یوآو گیلنٹ ایکس آ اسہ پوسٹ ئسیٹی پارے کہ ”ننا دشمنک تینے ڈھکنگ کپسہ۔ نن اوفتا پد رند ئے خلون و اوفتہ خلون۔“
یحییٰ سنوار ہفت اکتوبر 2023 آ حماس نا اسرائیل آ کروک جلہو تا ماسٹر مائنڈ آتیان اسٹ تکنگاکہ۔ اسرائیل نا غزہ ٹی آپریشن آتا بناء آن پد او ہمو بندغ آتیان اسٹ اس ہرافتہ اسرائیل پٹنگ اس و اودے خلنگ نا پک ارادہ کریسس۔
حماس ہفت اکتوبر 2023 آ غزہ غان اسرائیل آ جلہو کرسا اوڑے 1200 بندغ ئے مرگ ئنا گواچی و کم ءَ ود 250 ئے بندی کریسس۔ اسرائیل جلہو نا ورندی ٹی غزہ ئٹ آسمانی و زمینی کارروائی بناء کننگا ہراٹی غزہ نا جانجوڑی وزیر نا ردئٹ 42 ہزار آن زیات بندغ مرگ ئنا گواچی مسنو۔
یحییٰ سنوار کیہی سال آن غزہ پٹی ٹی حماس نا کاریم کروک راہشون مسنے و او حماس نا سلاہ بند کڑدہ غان خڑک تکنگاکہ۔
سنوار اینخو جولائی ٹی حماس نا مسکوہی سیاسی سروک اسماعیل ہنیہ نا ایران ئٹ مرگ ئنا گواچی مننگ آن پد حماس نا سروک گچین مسس۔
یحییٰ سنوار نا مرگ ئنا گواچی مننگ نا بارث ئات رپورٹ آک اندنو وخت ئسے آ مونا بسنو ہراتم اسرائیلی لشکر قطبی غزہ ئٹ جبالیہ باہوٹی کیمپ آ زمینی و فضائی جلہو برجاء تخانے۔
