سی ستمبر آ بلوچستان نا ضلع پنجگور آن زوراکی ئٹ بیگواہ کننگوک اِرا ایلم صابر نور و عابد نور نا وے آجو مننگ نا برخلاف خاہوت نا کنڈ آن ریلی کشنگا و داسا ڈپٹی کمشنر نا دفتر نا مونا تولوک برانز کننگ ءُ۔
برانزی ریلی ٹی چُنا نیاڑی تتون اوار بھلو کچ ئسیٹی بندغ آک اوار مسر و زوراکی نا بیگواہی تا برخلاف نعرہ خلکر و تومکا ایلم، صابر نور و عابد نور نا آجوئی نا خواست کریر۔
خاہوت پارے کہ اینو 16 دے مسنے کہ صابر نور و عابد نور ئے ویتہ ہچو ڈوہ ئسے آن ریاستی ٹارچر سیل آتیٹ بیدادی تا گواچی کننگ ءُ۔ تدوکا 16 دے ئٹی ریاست عابد و صابر نا خاہوت تون اسہ وڑ دروغ تھڑنگ ءِ، اول پاننگا کہ 24 ساعت ئٹی ہڑتُما ایلم تِہ یلہ کننگو، اوکان پد ہڑدے قول کیرہ کہ پگہ اوفتہ آجو کننگو ولے دائسکان ہڑتُما ایلمک بیگواہ ءُ۔
او پارے کہ اینو خاہوت بیوس مرسا ڈی سی نا دفتر نا مونا برانز کننگ ءِ، پنجگور نا الس آن خواست ءِ کہ برانز ئٹ اوار مرسا عابد و صابر تون اوار ایلو بیگواہ غا بندغ آتا آجوئی کن توار بڑز کیر۔
خیال ئٹ مرے کہ 31 ستمر نا سہب آ پاکستانی لشکر پنجگور نا علاقہ تار آفس ئٹی چھاپہ خلِسہ تومکا ایلم صابر نور و عابد نور ئے زوراکی ئٹ بیگواہ کریسس۔ خاہوت آتا کنڈ آن تومکا ایلم تا زوراکی نا بیگواہی نا برخلاف داکان مُست تولوک برانز کرسا سی پیک کسر ئے بند کننگاسس۔
پدان برانزی و کوالخواہ تا نیامٹ ہیت تران مس و برانز ایسر کننگا، کوالخواک اوفتِہ باور تسر کہ بیست و چھار ساعت ئٹی ہڑتُما ایلم تِہ یلہ کننگو ہرا نا سوب آن خاہوت آک برانز ئے ایسر کریر۔ ولے ہڑتُما ایلمک دائسکان بیگواہ ءُ۔
