مستونک نا ہندی بی بی فاطمہ پارینے کہ کنا مار مصطفی واپڈا ٹی کاریم کریکہ۔ 2000 ئٹی ہراتم فوجی حکومت نا وختا فوج واپڈا ٹی بس تو کنا مار ئتو لشکری کارندہ غاک غاو کریر و جنگ ہم کریر۔ جنگ آن پد کنا مار ئے درینگڑھ آ ٹرانسفر کننگا اسہ تو ئس کنا مار درینگڑھ ئٹی ڈیوٹی کرے۔ اونا اسہ تو ئس پورو مس تو او موکل کرِسہ تینا پُہریا نا ہلنگ کن ہنا و تینا پُہریا ئے ہلِسہ اُراغا بس تینا پُہریا نا زر آتہ کنے تس و تینا جیب خڑچ ئے ہرفے۔
او پارے کہ منَہ دے آن پد اونا موکل آک چھٹار و او تینا ڈیوٹی کن سر ہلک ہمو دے آن پد اینو اسکان او پدی اُراغا بتنے۔
او پارے کہ داسہ اودے 24 سال مسنے ولے دائسکان اونا ہچو حال و حوال اف کہ او ارانگ ءِ ارا حال ئٹی ءِ زندہ ءِ یا آخہ۔
بی بی فاطمہ پارے کہ کنا ایلو مار شہید فقیر عاجز ہرانا ڈیوٹی مستونگ کیڈٹ کالج ئٹی اس او تینا ایلم نا آجوئی کن ہیت کریکہ ولے 2010 ئٹی کنا مار فقیر محمد ئے کیڈٹ کالج آن پاکستانی لشکر نا کارندہ غاک بیگواہ کریر و اسہ تو ئسے آن پد اونا جشوک جون ئے غنچہ ڈوری مستونگ ئٹی خسار۔ ہندا وڑ کنا روزگار کروکا مار ہم شہید مس ہرا تینا ایلم کن انصاف خواہاکہ و اونا آجوئی کن ہیت کریکہ۔
