بلوچ ریپبلکن آرمی (بی آر اے) نا جارکش سرباز بلوچ تینا شنگ کروک درشان ئٹی پارینے کہ اینو سوئی ڈیرہ بگٹی نا علاقہ رئیس توخ و لنجو ٹی لس مخلوق نا برخلاف لشکرکشی کروکا پاکستانی فوج آ جتا جتا مسہ جاگہ آن جلہو کننگا، ہراڑے غُٹ دوانزدہ کارندہ مرگ ئنا گواچی و پانزدہ آن گیشتر ٹھپی مسّر۔
سرباز بلوچ نا پاننگ اس کہ اولیکو جلہو رئیس توخ نا ہَند آ بھلا سِلاح تیٹ کننگا، ہراڑے پاکستانی فوج ئنا کارندہ آک لس مخلوق آ زوراکی کننگ ئٹی اسر، دا جلہو ئٹی چھار کارندہ مرگ ئنا گواچی مس و ہشت ٹھپی مسّر۔
ارٹمیکو جلہو ئٹی پاکستانی فوج ئنا کارندہ آتا ہموتم لانچر و ایلو خودکار سِلاح تیٹ ٹِک کنّنگا ہراتم او لس مخلوق آ جلہو کن راہی مسوسر، جلہو ئٹی پاکستانی فوج ئنا اسہ بکتر بند گاڈی ئس بُھس مس، ہندن پنچ کارندہ خلّنگا و چھار ٹھپّی مس۔
سرباز بلوچ نا پاننگ اس کہ مسٹمیکو جلہو ئٹی شاخ نمبر چھار آ فوجی کارندہ آتہ ہموتم ٹِک کننگا ہراتم او تینا سنگت آتا کمک کن بنّنگ ئٹی اسّر۔ دا جلہو ئٹی مسہ کارندہ خلّنگا و گڑاس ٹھپی مسّر۔ ٹھپی آتیٹ اسہ کیپٹن ئس ہم ارے ہرا میجر حمزہ نا پِنا چاننگانے۔
جارکش نا پاننگ اس کہ پاکستانی فوج ئنا اِرا پوسکنو ‘سرویلنس ڈرون’ ہم ٹِک کرسا بِٹنگا۔ ہرا جنگ ئٹی بلوچ جہدکار آتا جاچ ئے ہلکُرہ۔
سرباز بلوچ مُستی پارے کہ دا علاقہ آتیٹ پین فوجی دستہ ہم بنّنگ ئٹی ءِ، ہرافتون مون تنّنگ کن جنگی وڑئٹ تیاری ارے۔ بےڈوہ آ مخلوق آ زوراکی کروکا ریاستی کارندہ آتہ جْوان وڑئٹ سبخ ہیل تنّنگو۔
