پاکستان نا صوبہ سندھ ئنا بنجائی شار کراچی ٹی استو “کراچی انٹرنیشنل ایئر پورٹ” نا پیشن آ پاکستان نا ایجنسیک ڈاکٹرماہ رنگ و سمی دین بلوچ نا گاڑی ئے تورِسہ اوفتِہ گاڑی آن پیشن کشار و بیدادی نا گواچی کرسا اوفتا موبائل فون و پاسپورٹ ئے پُھلار۔
دا رد ئٹ سمی دین بلوچ چاگڑدی حوالکاری میڈیا غا اسہ پوسٹ و ویڈیو کلہو ئس شنگ کرسا پارے کہ اندن کہ نن ائیر پورٹ آن پیشتمان ننا گاڑی ئے پاکستانی ایجنسی تا کارندہ غاک پولیس تون اوار گھیرہ کریر و گاڑی نا تہہ ئے پٹار و ننے آ بیدادی کرسا گاڑی نا ڈرائیور ئے لغت مُچ کریر۔
اونا پاننگ اس کہ ماہ رنگ بلوچ نا موبائل و پاسپورٹ ئے کراچی ایئرپورٹ آن اُراغا ہِننگ نا وختا ایجنسی نا کارندہ غاک پُھلار۔ و ننا گاڑی نا کلید آتِہ پُھلِسہ ننے اسہ ویرانو کسر ئسے آ الار۔ سمی بلوچ نا پاننگ اس کہ اگر ننے نسخان ئس مس تو دا نا ذمہ واری دا ریاست نا ساڑی آ حکومت و سندھ حکومت پی پی پی نا لِخا مرو۔
او پارے کہ بندغی حق آتیکن کاریم کروک و ایلو بندغ آتیان خواست ءِ کہ او ماہرنگ بلوچ ئے بے قانودی توننگ و اونا سفر کننگ آ رکھ خلنگ نا برخلاف توار بڑز کیر۔
ویڈیو ٹی ماہرنگ ہم اوار اس و پاننگ اس کہ اودے زور ئٹ توننگا، بیدادی کننگا و اونا موبائل ئے پھُلنگا۔ و اودے خود کش بمبار پاننگا۔
ڈاکٹر ماہرنگ بلوچ نا پاننگ اس کہ 5 ساعت اسکان کنے ایئرپورٹ آ توننگ مس و پدا ایئرپورٹ نا پیشن آ پولیس و ایجنسی تا کارندہ غاک نیام کسر آ ننتو بد اخلاقی کریر ننے آ دو بُڑز کریر۔ کنا موبائل فون و پاسپورٹ ئے دردیر۔
اونا پاننگ اس کہ اوفتا کا ٹارگٹ کنا پاسپورٹ و موبائل فون اس۔
