بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارے کہ سرمچارک تربت ئٹی ایم آئی نا کمکار و آواران ئٹی پاکستانی لشکر و تعمیراتی کمپنی ئے ٹک کریر۔
او پارے کہ 2 اکتوبر چھار شمبے آ ویگہ نا چھار بجہ غا سرمچارک تربت ئٹی ایم آئی کارندہ ئے سُمکاری کرسا مرگ ئنا گواچی کریر۔
ترجمان پارے کہ سنگانی سر کلات بازار نا ہندی، علی احمد نا مار و ایم آئی کارندہ ممتاز، بلوچ راجی تحریک نا برخلاف کاریم کننگ اسک و لس الس ئے دڑکو، بلیک میلنگ ئٹ ایم آئی کن کاریم کن بیوس کریکہ۔
اونا پارے کہ ایلو جلہو ئٹی سرمچارک سئے اکتوبر پنچ شمبے سُہب ئنا ہفت بجہ نا خُڑک آواران نا ہند پیراندر ئٹی حمل بازار نا ہند آ سنگر ہلِسہ کوزہ گیر پاکستانی لشکر نا پیدل ہنوکا کارندہ تِہ پوسکن و خودکار سلاہ تیٹ ٹک کریر۔ سُمکاری نا زد ئٹی بروکا اِرا فوجی کارندہ ہمو جاگہ غا مرگ ئنا گواچی مسر و ایلو فوجی کارندہ غاک تینا ساہ ئے رکھِسہ نرار، سرمچارک پدان بروک اسہ ٹرک ئسے ہم ٹک کریر۔
میجر گہرام بلوچ پارے کہ مُسٹمیکو جلہو 3 اکتوبر نا سُہب آواران ئٹی تعمیراتی کمپنی نا سائٹ آ کننگا ہراڑے بلڈوزر، ڈمپر و لوڈر تون پانزدہ لاری تِہ سُمکاری ٹی نسخان تننگا۔
اونا پاننگ اس کہ بی ایل ایف اسہ راجی تنظیم ئسے نا حیثیت ئٹ پھاش کیک کہ بلوچستان بلوچ راج ئنا سرزمین ءِ، پاکستان بلوچ سرزمین آ کوزہ کرینے و کوزہ گیر نا برخلاف سلاہ بند جہد تنظیم نا راجی فرض ءِ و دا راجی کڑدار ئے سر تننگ کن بلوچ سرمچارک ہراڑے ہم دشمن ئے ٹک کننگ کیرہ و دشمن لشکر نا دوست خواہ و کرائے نا قاتل آتون دشمن نا وڑ ئٹ مون تننگ مرو۔
او ودیک پارے کہ تنظیم پاکستانی ریاست نا جوڑ کروکا ڈیتھ اسکواڈ و کمکار تِہ گڈیکو وار خبڑدار کیک کہ او سلاہ تے بٹِسہ تنظیم نا مونا سرینڈر کیر اگہ نا اوفتتون دشمن نا وڑ ئٹ مون تننگ مرو، ٹھیکیدارک تینے ریاستی ڈک تیان مُر کیر اگہ نا اوفتِہ ہم دشمن نا وڑ ہُننگ مرو۔
او ایسر ئٹ پارے کہ بلوچستان لبریشن فرنٹ دا مُسٹ انگا جلہو تا زمہ واری ئے ہرفک و آجو بلوچستان اسکان ریاستی لشکر، ریاستی ڈٹ و کمکار تِہ ٹک کننگ مرو۔
