بلوچستان نا ضلع پَنجگُور و خاران آن پد دریابی شار گوادر نا تحصیل پسنی ٹی برانز بناء مس۔
پسنی نا ہندی در محمد شفقت و عبدالسلام و زورانسری بیگواہی و وے آجو مننگ نا برخلاف خاہوت و ہندیک پسنی زیرو پوائنٹ نا رہی آ برانز کرسا کسر ئے ہر وڑ ئنا ہن ءَ بر کن بند کرینو۔
پسنی برانز نا سوب آن اُلاخ آ تا مُرغن قطار لگانے و کیہی اُلاخ آک گھٹ مسنو۔
پسنی برانزی تا پاننگ ءِ کہ تومکا بندغ آتے اینخو 13 اپریل آ پاکستانی لشکر دزگیری آن پد نا درستو جاگہ ئسے آ درینے ہراکان پد اوفتا ڈو اف۔
پسنی ٹی برانزیک خواست کرینو کہ در محمد شفقت و عبدالسلام و ایلو بیگواہ غا بندغ تِہ زوت پھاش کرسا آجو کننگِہ، نہ تو ننا برانز برجاء مرو و پین سخت مرو ہرانا کُل زمہ واریک کالخواہ و صوبائی حکومت آ مرو۔
او بندغی حق آتا تنظیم آتیان خواست کرینو کہ او دا ویل آ توار بُڑز کیر۔
یاتی مرے کہ بلوچستان ئٹی زورانسری بیگواہی تا برخلاف اینو بلوچستان نا مُسہ جتاء ہند آ تیٹ برانز برجاء ءِ داکان مُست خاران آن بیگواہ مروکا چار ورنا امان اللہ محمد حسنی، امین اللہ، ارشاد احمد، و داؤد بلوچ نا زورانسری بیگواہی تا برخلاف اوفتا خاہوت آک و خاران نا سیاسی و چاگڑدی تنظیم آتا برانز پنچمیکو دے ہم برجاء ءِ۔
اندن درو بلوچستان نا ضلع پَنجگُور آن بیگواہ کننگوک اِرا ایلم صابر نور و عابد نور ئنا آجوئی کن برانز اینو اِرٹمیکو دے ہم برجاء ءِ۔
