بلوچ راجی زْرمبشت (بی این ایم) نیدرلینڈ ہنکین نا کُنڈ آن ایمسٹرڈیم ئٹی شہید ڈاکٹر منان بلوچ یونٹ ئٹی خواننگ سرکل ئس اڈ تنّنگا، ہرانا بھلنی ئے مہیم عبدالرحیم بلوچ کرے۔
دیوان بلوچستان نا شہید آتا یات ئٹی اِرا منٹ ئنا چُپی آن پد بناء مس۔ دا وختا بی این ایم نا بھاز آ باسکاک ہرافتیٹ جنرل سیکریٹری دیدگ بلوچ، فائنانس سیکریٹری بہار بلوچ، عمران حکیم بلوچ، ولید بلوچ، حلیم بلوچ، ہونک بلوچ، یوسف بلوچ، شاہ داد بلوچ، راشد بلوچ و ایلوفک بشخ ہلکُر۔
بشخ ہلوکاک خواننگ سرکل نا اہمیت، سیاسی پارٹی ٹی باسک آتا زمہ واریک و برانزی مظاہرہ آتا کڑد آ سرجمی ئٹ گپ کریر۔
او پاریر کہ بلوچستان ئٹی دہنو ہچّو علاقہ ئس اف ہراڑے پاکستانی فوج ئنا ظلم و زوراکی مف۔ زوراکی نا بیگواہیک، بےقانودی خلّنگ و مال ءَ مڈی تا لُٹ ءَ پُل اسہ رنگ برجاء ءِ۔ ریاست امن ئٹ مروکا برانز آتہ زوراکی تیٹ مَٹّائیسہ جہانی تیبر آ بلوچ جہد ئے نزور کننگ نا کوشست کیک۔
او پاریر کہ نوشکی، مستونگ و گْوادر ئٹی ریاستی فوج امن ئٹ مروکا برانز آتیا سُم کاری کرے ہراڑے چھار ورنا شہید مسر و بھاز آک ٹھپی مسر۔ ہندن میڈیا مہالو آن الّو داسا انٹرنیٹ ئے ہم منَہ بھلو شار اسکان مشکل ئٹ کاریم ئٹی ہتنگک۔
اوفتا پاننگ کہ بلوچستان ئٹی آزات میڈیا اف، چھنکو کچ ئس کاریم کروکا صحافی تیکن ہم کاریم کننگ ئے سخت کنّنگک۔ سیاسی و بندغی حق آتا جہدکار آتہ آزات کاریم کننگ الّیپسہ۔ ریاستی فوج بندغ نا زند و بندغی حق آتون گْوازی کنّنگ ئٹی ءِ ولے پوسکنا دور و باری ٹی ہم دا بابت ئٹ سرپندی بےمنّنگ نا بریبر ءِ۔ جہانی تیبر آ پاکستانی ریاست نا زوراکی تا برخلاف توار ہفّنگ ننا راجی زمہ واری ءِ۔
مُستی او تاریخ نا مثال ترسہ پاریر کہ مچّا دنیا ٹی کوزہ گیر ریاست آک مدام امن ئٹ برانز کروکا تحریک آتا زوراکی کرسہ اوفتہ سختی نا نیمہ آ دنّنگ خواہیرہ تاکہ زوراکی نا پِن آ اوفتہ چھٹفنگہ، پاکستان ہندن کنّنگ ئٹی ءِ۔
