حزب اللہ تینا شنگ کروک درشان ئٹی پارے کہ اونا راہشون حسن نصراللہ خلّنگانے۔
داکان مہالو اسرائیلی فوج پاریسس کہ حزب اللہ نا راہشون حسن نصراللہ و تنظیم نا گِڑاس کماندار سہیلی لبنان ئٹی اسرائیلی جلہو ئسیٹ خلّنگانو۔
حزب اللہ تینا راہشون حسن نصراللہ نا کھئینگ ئے منّانے ولے لبنانی تنظیم دا حوالہ ئٹ داسکان ودیک حوال شنگ کتّنے۔
داکان مُست شمبے نا سُہب اسرائیلی فوج پاریسس کہ بیروت ئٹی بالی جلہو ئسیٹ حزب اللہ نا راہشون حسن نصراللہ خلّنگانے۔
اسہ کُلہو ئسیٹ آئی ڈی ایف پارینے کہ ‘حسن نصراللہ داسا دنیا ئے خُلیفنگ کروف۔’
دا درشان بیروت ئٹی جلہو آن پد شنگ کننگا ہراٹی اسرائیل نا رد ئٹ حسن نصراللہ و حزب اللہ نا ایلو کماندار آتہ ٹِک کنّنگا۔
‘الجزیرہ’ نا حوال نا رِد ئٹ حزب اللہ تینا درشان ئسیٹ پارینے کہ سید حسن نصراللہ درو نا اسرائیلی جلہو ئٹی خلّنگانے۔
پیشن مُلک ئنا خبر تروک ادارہ ‘رائٹرز’ نا پاننگ ءِ کہ درو اسرائیل لبنان نا حکومت جاہ بیروت آ داسکان نا غُٹ آن بھلّا جلہو ئے کرے، ہراٹی حسن نصراللہ ئے خلّنگ کن حزب اللہ نا جاگہ ئے ٹِک کنّنگا۔
اسرائیل نا کُنڈ آن بالی جلہو آتا دا چرجوئی اٹکل پنچ گھنٹہ اسکان برجا مس، ہندن شمبے نا سُہب اسرائیل بیروت نا سُہیلی ہند آتیٹ و لبنان نا ایلو علاقہ آتیٹ بالی جلہو کرے۔
رائٹرز نا صحافیک بیروت ئٹی شمبے نا گْوربام و دے ٹِک آن پد اسکان بیست آن گیشتر بالی جلہو نا توار بِنگُر۔ حزب اللہ نا واک ئنا سُہیلی ہند آتان موڷ بش مسّنے و اسرائیلی فوج پارینے کہ بیروت جلہو آتیٹ حسن نصراللہ خلّنگانے۔
ایلو نیمہ آ صحافی تا کُنڈ آن حسن نصراللہ نا مرگ ئنا بابت ئٹ کروکا سوج آتا اسرائیلی فوج پارینے کہ دہن پاننگ وخت آن مُست ءِ، ولے حزب اللہ زیات دہنا حوال آتہ ڈھکّک ہندا خاطر آن ہچّس پاننگ مفک۔
