بلوچستان نا دریابی شار گوادر آن پاکستانی لشکر پنچ بندغ دزگیر کننگ آن پد بیگواہ کرینے۔
بیگواہ کننگوک بندغ آک نور بخش نا مار معراج نور، حسین نا مار اعجاز، حمزہ نا مار دودا خالد، ایوب حمزہ و یعقوب نا مار زکیریا زاکر نا پن تیٹ درست مسنو۔
پن کروک ورناک سنگت ءُ ہرا ضلع کیچ ئنا ہند دشت مکسر نا ہندی ءُ و اوفتے لشکری کارندہ غاک گوادر نا ہند نیو ٹاؤن آن 27 ستمبر آ ننکان دوانزدہ بجہ غا زوراکی ئٹ بیگواہ کرینو۔
ایلو کنڈ آن بلوچستان نا دریابی شار گوادر آن 07 مئی 2024 آ پاکستانی لشکر نا ڈکھکوک ادارہ آک، بندغ آتا مونا دشت سولی نا جہی محمد رحیم نا مار مسلم ئے زوراکی ئٹ بیگواہ کریر اوکان پد اونا ہچ ڈس اف۔
خاہوت نا پاننگ ءِ کہ مسلم نا بابت ئٹ نن علاقہ نا معتبرآتون ہیت کرین اوفک ننے ہموتم حوصلہ تسُر ولے چھار تُو و بیست دے گدرینگ آن پد دائسکان ننے ہچ پاننگ متنے۔
اوفک پاریر کہ داکان مُست ہم مسلم ئے 2018 ٹی جون ئنا تو آ پاکستانی لشکر دزگیر کننگ آن پد بیگواہ کریسس و اوڑا بیدادی کرسا نیم زندہ حالیت ئٹی اسپتال آ سر کریر، اوکان تینا خرچہ ئٹ نن اودے کراچی آ درین ڈاکٹر آک پاریر کہ اونا بِک آک خراب ءُ بھاز علاج آن پد او جانجوڑ مس۔ داسا اسہ وار پدا اودے بیگواہ کننگانے۔
اوفتا پاننگ ءِ کہ مسلم کن نن سخت فریشان اُن اونا زند ئے خطرہ ءِ، نن بندغی حق آتا ادارہ تیان خواست کینہ کہ مسلم نا آجوئی کن توار بُڑز کیر تاکہ او آجو مرے۔
