بی این ایم نا ڈل خواست کرے کہ ورکنگ گروپ زوراکی نا بیگواہی تا ویل ئے ایسر کننگ کن پاکستانی حکومت آ زور شاغِہ۔
جنیوا سوئٹزرلینڈ ئٹ بلوچ نیشنل موومنٹ نا چیئرمین ڈاکٹر نسیم بلوچ نا کماشی ٹی اسہ ڈل ئس بلوچستان ئٹی زوراکی نا بیگواہی تا ساڑی آ ویل آ ہیت کننگ کن اقوام متحدہ نا زوراکی نا بیگواہی تیا کاریم کروک ورکنگ گروپ نا نمائندہ غا تتون اوڑدئی کرے۔
او ذمہ وار ورکنگ گروپ ئے اسہ شابیٹی رپورٹ ئس تسر، ہراٹی ہمو بندغ آتا پِنک اوار اسر ہرافتے ریاستی ادارہ غاک و بے ریاستی ٹولیک بیگواہ کرینو۔
رپورٹ ئٹ زوراکی نا بیگواہی تا دستاویزی کیس، زیمی مروکا تا فریاد و زوراکی نا بیگواہی تا ہمو خاہوت آتیا زہم نا بارث ئٹ پاریر۔
بیگواہ غا بندغ آتا خاہوت آک ہم دا توڷ ئٹ اوار مرسا تینا ڈکھیائی آ آزموندہ و دا رد ئٹ شاہدی تِہ تسر۔
او تینا بندغ آتا ریکارڈ مروک ویڈیو تِہ تسر و اوفتا رکھوک آجوئی نا خواست کریر۔
خاہوت آک پن کروک ورکنگ گروپ آ زور شاغار کہ او اوفتا زوت آجوئی کن کوشست کے و زوراکی نا بیگوائی تا ویل ئے ایسر کننگ کن پاکستانی حکومت آ زور شاغِہ۔
بی این ایم نا ڈل ہیت کرسا پارے کہ زوراکی نا بیگواہی تا رد ئٹ ورکنگ گروپ زوراکی نا بیگواہی تا کیس آتا پٹ ءَ پول ئے کے و زوراکی ئٹ بیگواہ کننگوک بندغ آتا رکھوک واپسی ئے پک کننگ کن پاکستان آ زور شاغِنگ کن تینا مخ تفی نا باور کرفِہ۔
ورکنگ گروپ بندغی حق آتا دا نازرک آ ویل ئے ایسر کننگ کن بی این ایم و ایلو ذمہ وار تنظیم آتتون ودیک اسہ جاہی ودی کننگ نا ہم پارے۔
مجلس ئٹ بلوچستان ئٹی بندغی حق آتا حالیت آ ودوکا جہانی خلیس و بروکاتم (مستقبل) ئٹ زوراکی نا بیگواہی تِہ توننگ و ڈوہدار تِہ انصاف نا تلہ غا ہتنگ کن دمدستی گھام ہرفنگ نا خواست آ زور تس۔
