گوادر نا سمندر ئٹی سلاہ بند دیری داڑیل آتا خواجہی ءِ، گشتی ٹولی تتون اوار جہی آ مچھی ہلوکا تِہ خطرہ ءِ۔
حوال تابرد ئٹ سمندری رکھوک آک اوفتے توننگ ئٹ بےسوب ءُ۔ سلاہ بند ٹرالر آتا پاسو آن جہی آ مچھی ہلوکا تتون اوار گشتی ٹولی تیا سُمکاری ہڑدے نا ہیت ئس جوڑ مسنے۔ مچھی ہلوکا دا حالیت نا سوب آن خلیس نا گواچی ءُ۔
شابیتی حوال تا رد ئٹ گوادر نا علاقہ سربندن نا سمندری سیم ئٹ ٹرالر مافیا سمندری ساہدار تا زنک کشی ٹی آختہ ءِ ہرافتتون خودکار سلاہ ہم ارے۔
ہندی مچھی ہلوکا تا غاو کننگ آ فشریز نا گشتی ٹولی کاروائی کن ہنا تو اوفتیا خودکار سلاہ تیٹ جلہو کننگا۔
ہندی مچھی ہلوکا تا رد ئٹ دا ٹرالر آک بے قانودی مچھی ہلنگ تون اوار سلاہ بند ءُ ہرا گوادر نا سمندری سیم ئٹ سمندری ساہدار تا زنک کشی کننگ ءُ و ہندی مچھی ہلوکا تیا سُمکاری کیرہ ہرا نا سوب آن ہندی مچھی ہلوکا خلیس نا گواچی ءُ۔
او پاریر کہ ہندی مچھی ہلوکا فریشان ءُ کہ گوادر نا سمندری سیم ئٹ ساڑی لشکری کارندہ غاک اوفتا برخلاف کاروائی کننگ افس۔ او حکومت بلوچستان آن خواست کرینو کہ اوفتا روزگار تون اوار جان و مال ئے دا سلاہ بند دیری داڑیل آ تیان رکھیر۔
