شیشہ ڈغار قلات ئٹی ہفت دے مُست پاکستانی لشکر نا دو آن اسہ دروغ ئنا مونتس ئسیٹی کھسفنگوکا ایلم تا خاہوت پارینے کہ پاکستانی لشکر نن ئنا یک بجہ غا چھاپہ خلِسا تومکا ایلم تِہ اُراغان ہرفے و زرس مُستی دننگ آن گڈ کھسفِسا اوفتا جون تِہ خسا۔
پاکستانی لشکر نا دو آن کھئوکا ایلم محمد اسماعیل و محمد عباس نا باوہ عبدالغنی اردنگ نا ناجوڑی نا گواچی ءِ۔
اوفتا لمّہ نا پاننگ ءِ کہ نن ئنا یک بجہ غا پاکستانی لشکر نا وردی بینوک بندغ آک ننا اُرا نا چھت آ لگار، کنا ہڑتُما مارک خاچوک، چھت آ گدرپ گدرپ مس ولدا چخلی بمب ئس خسار، پدا ننا زیہا سمکاری کریر۔
او پارے کہ ولدا جھٹ ئسے آن پد توار خلکر کہ اُراٹی اخس نرینہ اریر کُل پیشتمر۔ کنا مارک پیشتمار و کارندہ غاک اوفتِہ پاریر کہ دو تَہ بڑزا کبو کنا مارک دو تِہ بڑزا کریر۔ ننا اُرا ئے پٹار کنے پاریر سلاہ تِہ کشے۔ ای پاریٹ نُم اُرا ئے پٹارے سلاہ مسکہ نُم خناریکہ۔ ننا اُراغان او ہچو سلاہ خنتور و کنا تومکا مار تِہ ہفیر دریر و زرس مونی دننگ آن گڈ کھسفیر بٹیر۔
او پارے کہ کنا مار محمد اسماعیل ہرا نا وہی 20 سال اس تینٹ ناجوڑ اس و اگہ سہب ئنا دارو کنتوکہ تو تیبہ غا دے شَل تموک مسکہ، و ایلو مار محمد عباس ہرا نا وہی 17 سال اس سہب آن شام اسکان ڈغار تیا کاریم کرسا تینا باوہ نا دارو درمان تا خرچہ ئے کشاکہ۔
لمّہ نا پاننگ اس کہ ای لشکری کارندہ غا تا نت تیا تماٹ و پاریٹ کہ کنا مارک اگہ گڑاس کرینو تو اوفتِہ تھانہ غا دبو و عدالت ئٹ دبو، اگہ اوفتا ڈوہ ثابت مس تو اوفتِہ کنا مونا خلبو ولے ظالم آک مار تِہ لمّہ نا جھولی آن ہرفِسا دریر و زرس مُستی دننگ آن گڈ کھسفیر۔
اوفتا لمّہ پارے کہ اوفتِہ دننگ آن زرس پد ہراتم نن سمکاری نا توار بنگن تو ای تینا ناجوڑ آ بندغ ئے الاٹ اُراغان زرس مُر ویرانو ہند ئسے آ سر مرسا ہُراٹ تو کنا تومکا جغر نا ٹکر تِہ سم خلسا بٹیسر، پاکستانی لشکر اوفتِہ کھسفِسا بےوارث الاسسس ہناسس۔
اوفتا لمّہ پارے کہ تینا تومکا ورنا غا مار تا جون تِہ خناٹ وکارہ کریٹ کنا فریاد ئے بنوکو کس الو ای یکہ اسٹ نئے او ظالم تیان سوج کروکو کس اس کہ دا مسکین آ چُنا تِہ بیدس ثبوت آن انتئے خلک۔
خاہوت نا پاننگ ءِ کہ پاکستانی لشکر آن خواست کرین کہ اگہ او ڈوہ ئس کرینو تو اوفتے دزگیر کرسا تھانہ غا دیر ولے او ننا چُنا تِہ ننا مونا خلکر و مونتس نا پن ئے تسر۔
