بلوچ یکجہتی کمیٹی نا ترجمان پارینے کہ ریاست پاکستان بلوچستان ئٹی کیہی بندغ آتا پن تِہ فورتھ شیڈول ئٹی شاغِسہ ہمو کُل بندغ آتا زند آ تِہ بے رکھوک کرینے۔ فورتھ شیڈول ئٹی شاغنگوکا بندغ آتیٹی پروفیسر، ٹیچر، نوشتکار، ڈاکٹر، صحافی، سیاسی، چاگڑدی و بندغی حق آتا باسک آتون اوار تیبہ بلوچستان آن کیہی بندغ آک اوار ءُ۔ ولے ہرا بندغ آتا پِنک فورتھ شیڈول ئٹی شاغنگانو، اوفتِے ریاستی ڈھوکوک ادارہ آتا کارندہ آک سی ٹی ڈی نا پِنا فون کرسا مخلوق ئے ڈھکوک ادارہ آتا دفتر تیا حاضری تننگ کن بیوس کننگ ءُ۔ اندن ریاست پاکستان کیہی بلوچ پروفیسر، ٹیچر، نوشتکار، ڈاکٹر، صحافی، سیاسی، چاگڑدی و بندغی حق آتا باسک آتا تعلقداری ئے سلاہ بند تنظیم تون گھنڈِسہ اوفتا پِن تِہ فورتھ شیڈول ئٹی شاغِسہ اوفتا خاہوت آتِہ زہنی اذیت نا گواچی کننگ ءُ۔
ترجمان پارے کہ نن سرپند مرینہ کہ ریاست بلوچستان ئٹی زوراکی نا بیگواہی، بیدس عدالت خون و ملٹری بربریت تون اوار مخلوق ئے خلیفنگ و چرجوئی ئٹ اسہ ذہنی اذیت ئسیٹی تخنگ کن فورتھ شیڈول آن بار انگا چم بازی تِہ کاریم ئٹ ہتنگ ءِ۔ فورتھ شیڈول و دننگا ایلو پرتشدد ریاستی چم بازی تا مسخت تیبہ بلوچستان ئے اسہ اندنو کنڑول کیمپ ئسیٹی مٹ کننگ ءِ ہراڑے مخلوق ریاستی مرضی آن بیدس دم ہم ہلنگ کپ۔ ریاست پاکستان بلوچستان ئٹی تینا دننگا ڈٹ تِہ پورو کننگ و قانود و پن ئنا صوبائی اسمبلی ءِ کاریم ئٹ ہتسہ تینا کُل پرتشدد و بے بندغی ڈٹ تِہ قانودی دروشم تننگ ءِ، ہرا نا پوسکنا مثیل فورتھ شیڈول ئٹی کیہی بندغ آتا پن تِہ اوار کننگ ءِ۔
او پارے کہ نن ریاست و اونا کُل ادارہ تیا پاش کینہ کہ نن بلوچستان ئٹی ریاست نا ہر ظلم و زوراکی نا برخلاف السی مزاحمت کرون و السی تاغت ئٹ بلوچستان ئٹی ریاست نا دننگا کُل بندغ کش ڈٹ و پالیسی تِہ بےسوب کرون۔ نن بندغی حق آتا ادارہ تیان خواست کینہ کہ او بلوچستان ئٹی ریاست نا پوسکنا پرتشدد پالیسی و بندغی حق آتا لتاڑ نا دمدستی نوٹس ہلیر۔
