بلوچ آجوئی دوست راہشون میر عبدالنبی بنگلزئی چاگڑدی حوالکاری تلہ ایکس آ پوسٹ ئس کرسا پارے کہ قلات ئٹی آپریشن نا پِنا پاکستانی لشکر نا دُروغ ئنا مونتس ئٹی بے ڈوہ آ بلوچ ورنا اسماعیل و حبیب اللہ ئے کھسنفگ پاکستانی لشکر نا گندہ غا جارحیت نا چرجوئی ءِ۔
بلوچ راہشون پارے کہ بلوچ راج ئے اونا زنک کشی ئٹ ایسر کننگ مفک و نئے کہ بے ڈوہ آ بندغ آتے کھسفنگ ئٹ تحریک ایسر مننگ کیک۔
یاتی مرے کہ ہنوکا دے تیٹ پاکستانی لشکر اِرا بے ڈوہ ءُ ایلم اوفتا اُرا غان چھاپہ نا وختا دزگیر کرسا مچہ مُر دریسس و تومکا تے سُم خلِسہ کھسفیسس۔
پاکستانی لشکر نا ترجمان آئی ایس پی آر اِرا سرمچار خلنگ نا دعوی کریسس، ہندی بندغ آک آئی ایس پی آر نا دعوی ئے دروغ ئس پارِسہ دا تدینی ئے دروغ ئنا مونتس ئس پاریسر۔
