بلوچ یکجہتی کمیٹی نا ترجمان تینا شنگ کروک بیان ئٹی پارینے کہ ننے پاکستان نا بنجائی حکومت نا کنڈ آن بلوچستان ئٹی ریاستی فوج و ادارہ آتے شک ئنا بنداو آ کی شاری تی دزگیر کننگ و مُسہ تُو بیدس مقدمہ آن دزگیر ئٹ تخنگ نا اختیار تننگ نا فیصلہ غا سخت خلیس ءِ، دا گھام بے قانودی وڑ ئٹ برجاء زنک کشی ئے جواز تننگ و داٹی ودکی نا کوشست ءِ۔
او پاریر کہ اسل ئٹ، فوج مُست آن عملی وڑ ئٹ دا اختیار تخک، ہڑدیئی بنداو آ بلوچ شاری تیا قانودی کارروائی آن بیدس بیگواہ کننگک و اوفتے مرغن وخت، تُو و سال تسکان، بیدس مقدمہ آن ڈھکوک ٹارچر سیل آتیٹ نظر بند تخنگک و دا بےقانودی عمل کیہی سال آن بلوچستان ئٹ برجاء ءِ۔
ترجمان نا پاننگ اس کہ تیبہ بلوچستان ئٹی، مکران آن ہلیس کوہ سلیمان اسکان، زوراکی نا بیگواہیک ہڑدے نا کاریم جوڑ مسنو۔ ہڑدے بلوچ آتے زوراکی ئٹ بیگواہ کننگک، و دا پوسکنا قانود، بیرہ پن ئنا “مشکوک آ بنداغ” آتا پن ئٹ دا زوراکی نا بیگواہی تے پین تیز کرو و بلوچستان ئٹی بندغی حق آتا لتاڑ تے قانودی رکھ ایتو۔
بی وائی سی نا رد ئٹ بلوچستان مُست آن زوراکی نا بیگواہی تیان کُل آن زیات زیمئ مروکو علاقہ اسے ہراڑے ہڑدے اسٹ آن زیات بلوچ زوراکی ئٹ بیگواہ کننگرہ، بنجائی حکومت نا پوسکنا فیصلہ نا مسخت ریاستی لشکر ئے بلوچستان ئٹی زوراکی نا بیگواہی تیا تیبہ قانودی و آئینی اختیار تننگ ءِ۔ دا فیصلہ دا ہیت ئے یخینی جوڑ کرو کہ فوج ئے بلوچستان ئٹی نہ بیرہ ظلم و زوراکی آ اختیار مرے بلکہ فوج ئنا ہر عمل ئے قانودی رکھ تننگو۔
ترجمان ودیک پارے کہ دا بیم تروک گھامگیج بلوچستان ئٹی بندغی حق آتا حالیت نا بارث ئٹ بھاز خلیس ودی کرینے، ننے خلیس ءِ کہ دا وڑ ئنا گھام تیان بلوچستان بندغی حق آتا لتاڑ نا بنجاہ جوڑ مرو ہراڑان مننگ کروک وڑ ئٹ لکھ آ بندغ آک بیگواہ کننگور۔
او بندغی حق آتا جہانی تنظیم آتیان خواست کرینو کہ او دا فیصلہ نا برخلاف توار بڑز کیر و دمدستی ایکشن ہلیر تاکہ بلوچستان ئٹی ودیک ظلم مننگ آن توننگ مرے۔
