زرمبش نوشتانک
امیت و بے امیتی نا نیام ئٹ زند ئنا چیچلو کُننگ۔۔۔ دا گڑا تیان ہمو واخب مننگ کیک ہرا تینا سے نا بیگواہی ئے خنانے۔۔۔ و دا ہم گواچن اسے کہ دا دڑد ہر ارٹمیکو بلوچ خاہوت نا بخت ئٹ لکھنگانے۔۔۔ دنو بھاز خاہوت ارے ہرا ریاست نا خلیس ئٹ بریرہ، چُپ مریرہ، ہیت کپسہ۔۔۔ اسہ وے کھٹوکو ودار ئسے نا گواچی مریرہ، ولے ظالم آن سوج کپسہ کہ اوفتیا دا ودار انتئے چٹی کننگانے۔
اندا سوب آن ای دا ہیت آ یخین تخوہ کہ بیگواہ کننگوک بندغ آتا خاہوت آتا دڑد اسٹ مننگ آن ویتہ ہم جتا ءِ۔۔۔ انتئے کہ ہر فیک انکاؤنٹر آن پد اسپتال آتیا تینا ایلم تا چاہنداری کن پھیری کننگ، ہر جشوک جون ئٹ تینا ایلم، باوہ، مار و ارغ نا نشانی تے پٹنگ نا کوشست کننگ، دڑد و اذیت نا اسہ اندنو دروشم ئسے ہرا بندغ ئے خوࣿرہ غان بار تہٹی کُنِسہ کائک۔ ولدا ہم کیہی ایڑک اینو دا غٹ ہڑاند آتیان ویتہ ہم ایٹمی ریاست نا مونا سلوک ءُ و نہار نا باء ٹی دو شاغِسہ تینا ایلم تے آجو کرفنگ نا کوشست کننگ ءُ، ہمو ایڑ تیان اسٹ سائرہ ہم ارے۔
ای تینا مارشت نا کچ ئے چاوہ و پُہہ مریوہ۔۔۔ ای دا ہیت ئے چاوہ و منیوہ، کہ ای او وڑ سائرہ نا دڑد ئے مارنگ کپرہ۔۔۔ وا ہم۔۔۔ اینو اسہ ایڑ ئسے نا خواری و اونا پندھ ئے لوز آتا دسک ئٹ خُلنگ آ بیوس اُٹ۔ کنتو شاید دنو لوز مروف ہرافتے ای کاریم ئٹ ہتِسہ اسہ ایڑ ئسے نا دڑد ئے درشان کیو۔۔۔ اونا پندھ اونا خواری تِہ درشان کیو، اونا سگ، اونا جیرت، اونا دلیری ئے درشان کیو۔
ای بیوس اُٹ کہ تینا چھار پنّوکو لوز کاریم ئٹ ہتِسہ ہمو ایڑ ئے پاو کہ نا جہد ستا کڑزک۔۔۔ نی کیہی ایڑ تیکن امیت نا چیدہ اُس۔۔۔ نا جہد کیہی ایڑ تے دا حوصلہ تسنے کہ او چُپ تولپس، توار بڑز کیر۔۔۔ بش مریر سامراج نا خن تیٹ خن خلِسہ اودے پار کہ ننا سگ، ننا حوصلہ، ننا امیت و ننا یخین نا ظلم و زوراکی تیان زیات سوگو ءِ۔۔۔ نا جہد اسہ امیت اسے ہمو پٹیئا تیکن ہرافتے خاہوت دا پارِسا چُپ کرفک کہ اسہ ریاست ئسے نا مونا ننا توار، ننا کرود و کوکار ہچ کاریم ناس اف۔۔۔ نا جہد شاہدی ءِ دا ہیت ئنا کہ اسہ چُنکو خلق ئسے آن پیشتموکو چُنک سَن مسڑ ئس ریاست نا روتہ غا تے سُرفنگ کیک۔۔۔ اسہ چُنک سَن مسڑ ئس ہرا تینا خلق و اُراغان ہچ وخت پیشتمتویسس، اینو اسہ ایٹمی ریاست ئسے نا مونا سلوک اودے پاننگ ءِ کہ کنا راج کنا پد ئٹ کنا راج سلوک ءِ و اینو کنا توار کنا سوج کنا کرود نا بنداو آتے چھنڈنگ ءِ۔
اسہ سامراجی تاغت ئس، ایٹمی ریاست ئس، لکھ آ لشکر تا خواجہ ئس بش مرے دو ہورک ءُ بیوس ءُ ایڑ ئسے خلیفنگ کن تینا تھوفنک بردار آتے یلہ کے اونا مونا سلیفِہ، اودے بھیم ئنا گواچی کننگ کن چھٹی خسِہ و اودے مرگ ئنا کلہو ایتے گُڑا چاس کہ او ایٹمی ریاست نا دیک بھاز بچھتنو۔
غٹ ڈکھ، فریشانی و ہڑاند آتیان ویتہ ہم سائرہ اسہ مَش ئسے نا وڑ سلوک ءِ۔ سوگَو، بے پِنوک، بے سُروکو مَش ئس۔ ہراڑا اخس ڈکھ و ویل آتا باریم ہمپینگ مرے ولدا ہم تینا جہد آن اسہ انچ ئس پدی مننگ کن تیار اف۔ او تینا زند ئے ہمو جہد ئنا پن آ کرینے ہرا اونا ایلم تیکن، راج کن ءِ، بروکا وخت کن ءِ و پدریچ کن ءِ۔ او کیہی ایڑ تیکن اومیت نا چیدہ ءِ۔
