بلوچستان حکومت پشتون تحفظ موومنٹ نا راہشون منظور پشتین نا بلوچستان آ بننگ آ رکھ خلکنے۔
محکمہ داخلہ بلوچستان نا کنڈ آن نوٹیفیکشن شنگ کننگانے ہرا نا رد ئٹ پشتون راج دوست راہشون منظور پشتین آ بلوچستان نا کل ضلع آتیٹ بننگ آ رکھ خلنگانے۔
پشتون تحفظ موومنٹ نا راہشون 90 دے اسکان بلوچستان آ بننگ کپک۔
پشتون تحفظ موومنٹ بلوچستان نا سروک زبیر شاہ نا دا رد ئٹ پاننگ اس کہ 25 اگست آ منظور پشتین ئے پشتون راجی جرگہ ٹی اوڑدئی کن توننگ کن پیپلزپارٹی صوبائی حکومت نا کنڈ آن رکھ خلنگانے ہرا ریاست نا ہبکئی ئے پاش کیک۔
پشتون راہشون ودیک پارے کہ ریاستی ادارہ آک خلیس نا گواچی ءُ، 11 اکتوبر آ پشتون راجی عدالت ئٹی 77 سال آن پشتون راج آ مروکا ظلم، زوراکی و پشتون راج ئنا استحصال آ راجی فیصلہ مرو۔
او پارے کہ حکومتی نوٹیفکیشن بلوچستان ئٹی منظور پشتین ئے پشتون راہشون و سروک آتتون اوڑدئی آن توننگ نا بےسوب کوشست اسے۔
