27 جون 2024 آ پاکستانی ڈھکوک ادارہ و سی ٹی ڈی نا ڈون آن کوئٹہ آن بیگواہ کننگوک ظہیر احمد بلوچ دائسکان آجو متنے۔
ظہیر احمد نا خاہوت نا کنڈ آن اونا آجوئی کن 15 دے اسکان برانز کننگ آن گڈ حکومت، خاہوت و بی وائی سی نا نیامٹ معاہدہ مس و ظہیر احمد نا آجوئی کن اسہ کمیٹی ئس جوڑ کننگا ہرا حکومتی باسک، خاہوت و بی وائی سی نا سروک آتیا ساڑی اس۔
خاہوت نا پاننگ ءِ کہ حکومتی باسک آتا کنڈ آن تروکا 15 دے ئنا ڈیڈ لائن ئے اسہ تُو ئس گدرینگانے ولے ہچو گھامگیج متنے و ظہیر احمد بلوچ دائسکان بیگواہ ءِ۔ حکومتی کمیٹی نا باسک آک گھوجالینگ ئٹی ءُ و ظہیر احمد بلوچ ئے آجو کننگ کن سوبر افس نئے اوفتتون دنو اختیار ارے و بیرہ وخت گزرانی کننگ ءُ۔
او پارینو کہ ظہیر احمد بلوچ نا آجوئی کن ہچو گھامگیج مفننگ نا سوب آن خاہوت فیصلہ کرینے کہ او زوت اسہ پریس کانفرنس ئسے ٹی تینا لائحہ عمل نا پڑو کرور و پر ایمن برانز نا کل کسر تے کاریم ئٹ ہتور و داکان بیدس بندغی حق آتا جہانی و ہندی تنظیم و سول سوسائٹی نا کل فکری تپہ آتا بندغ آتیان خواست کرینو کہ او ظہیر احمد بلوچ نا آجوئی کن توار ہرفر۔
ایلو کنڈ آن بلوچستان نا ضلع مستونگ آن پاکستانی لشکر نا دو آن زوراکی ئٹ بیگواہ کننگوک ارشاد و شاہ نواز ہم دائسکان آجو متنو۔
ارشاد احمد نا خاہوت نا پاننگ ءِ کہ اوفتے سلاہ بند بندغ آک 16 اگست نا نن مستونگ ئٹی اوفتا اُراغان بیگواہ کرینو۔
اندن زوراکی ئٹ بیگواہ کننگوک شاہ نواز نا خاہوت اونا زوراکی نا بیگواہی نا حوال ئے وائس فار بلوچ مسنگ ئے تسنے۔
او غاو کرینو کہ کردگاپ نا ہندی نور بخش نا مار شاہ نواز ئے پاکستانی لشکر برجاء سال ئنا 4 اپریل آ عبدالغنی تون منگچر بازار آن زوراکی ئٹ بیگواہ کریسس ہراکان گڈ عبدالغنی آجو مس ولے شاہ نواز دائسکان بیگواہ ءِ۔
