بلوچ اسٹوڈنٹس ایکش کمیٹی نا بنجائی جارکش پارینے کہ حب پبلک لائبریری نا ہُرے نا ویل آک ہرا انتظامی نابودی نا سوب آن دائسکان ایسر متنو ہرافتیا تنظیم مُست ہم کمپین و برانز کرسا بسنے۔ حب پبلک لائبریری ہرا کہ شار ئنا اسٹ انگا پبلک لائبریری ءِ، بنداوی آسراتی تیان پد تموک ءِ ہراٹی کُننگ نا صاف ءُ دیر، بجلی و فرنیچر تون اوار ایلو آسراتی تا مفننگ نا سوب آن خوانندہ غاک ذہنی کوفت ئنا گواچی ءُ۔ ایلو کنڈ آن لائبریری نا جاگہ بھس کاری آ سر ءِ ہرا نا چھت داسان نا مروکا پر تا سوب آن بد حال ءِ۔
جارکش پارے کہ انتظامیہ تون ڈپٹی کمشنر نا کیہی اوڑدئی تیان پد ہم حب پبلک لائبریری نا سخٹ انگا جیڑ آتا ہچو دیمروی ئس خننگ متنے۔
جارکش پارے کہ ایلو نیمہ غان کالج آف نرسنگ غلام قادر حب ئٹی انتظامیہ نا جابر انگا رویہ خوانندہ آتا خواننگ نا زوالی نا سوب مننگ ءِ۔ تنظیم ئے غاو رسینگانے کہ کالج اسٹاف ساندہ خوانندہ تتون جوانو روشت تخپک و امتحانی رزلٹ آتا ہُرے کننگ، خوانندہ آتیان ذاتی کاریم ہلنگ، بے ضروری کاریم تیٹی زیات فیس ہلنگ تون اوار خوانندہ تے کیہی وڑ ئٹ ذہنی دباؤ نا گواچی کننگ آن کیہی لائخ ءُ خوانندہ کالج ئے النگ آ بیوس مسنو۔
او پارے کہ تدوکا دے تیٹی خوانندہ آک سیکریٹری آف ہیلتھ بلوچستان ئے اسہ چھٹی ئسیٹی دا جیڑہ آتا پٹ ءَ پول نا بابت ئٹ اسہ درخواست ئس نوشتہ کریر ہراڑا عمل کننگ نا جاگہ غا کالج پرنسپل تون اوار انتظامیہ گیشتر زوراکی نا عمل ئٹ خوانندہ تے مڈ سمیسٹر امتحان ئٹی فیل کننگ نا دڑکو تننگ ءُ ہرا افسوس نا ہیت اسے۔
او پارے کہ نن حب ئنا ضلعی انتظامیہ تون اوار محکمہ تعلیم آن خواست کینہ کہ دا ویل آتے سوبری ئٹ ایسر کیر، حب پبلک لائبریری ئے بنداوی آسراتی ترسا لائبریری ئے دوارہ فعال کننگِہ و کالج آف نرسنگ غلام قادر حب ئنا اسٹاف نا برخلاف کاروائی کننگ مرے و خوانندہ آک بیدس فریشانی آن تینا خواننگ نا سفرئے برجاء تخنگ کیر۔ اسہ بلوچ خوانندہ تنظیم ئس مننگ نا حیثیت ئٹ بلوچ اسٹوڈنٹس ایکشن کمیٹی ہر بلوچ تعلیم دشمنی پالیسی تا برخلاف خوانندہ آتون سلوک ءِ۔
