کوزہ گیر پاکستان نا جوڑ مننگ نا دے ئنا رد ئٹ بلوچ نیشنل موومنٹ ( بی این ایم) نا ترجمان تینا بیان ئٹی پارے کہ چھانڑدہ اگست پاکستان ئٹ محکوم آ راج آتیکن مون ءُ دے اسے۔ اینو آن ہفتاد و ہفت سال مُست کالونیل تاغت آک تینا سواد آتیکن ہرا ڈیہہ ئے جوڑ کریر اینو او جہان نا ایمنی و سلامتی و بندغی کن کُل آن بھلا خطرہ جوڑ مسنے۔
او پارے کہ پاکستان ئٹ اینو بلوچ، پشتون، سندھی، کشمیر و گلگت بلتستان نا الس کن ہچو خوشی نا ہیت ئس اف بلکہ ڈکھ و مودہ نا ماحول اسے۔ خوشیک بیرہ پنجاب کن ءُ ہرا محکوم آ راج آتا آجوئی ئے پُھلانے و ایلو راج آک دا پن ئنا” آجوئی نا خوشی ” تیان بے چکار ءُ انتئے کہ پاکستان ئٹی او آجو افس بلکہ محکوم نا زند گدریفنگ ءُ۔
او پارے کہ بلوچستان ئٹی پاکستانی لشکر ہر سال چھانڑدہ اگست آ لالچ و خلیس ئے کاریم ئٹ ہتَسہ ہم پن ئنا آجوئی نا خوشی تا مجلس اڈ تننگ ئٹ بےسوب مریک۔ ہرا بلوچ الس ئنا پاکستان آن بیزاری و خار نا درشانی ءِ۔
اونا پاننگ اس کہ تدوکا ہفتاد و ہفت سال ئٹی اسہ دے ئس ہم دنو بتنے کہ پاکستان نا گواچنی کوالخواک ظلم و زوراکی نا پالیسی تے یلہ کرینو۔ بلوچ آتا وسائل آتے لُٹنگ کن بلوچ آتے اوفتا راجی اختیار آن پد بٹِسہ بلوچ گلزمین ئے براہ راست پاکستانی لشکر نا دوٹی تننگانے۔ سول انتظامیہ بیرہ فوج ئنا آسراتی تروک نا کڑد ادا کننگ ءِ و الس ئنا نمائندگی نا پنا بلوچستان نا دتکی اسمبلی فوج ئنا آلہ کار آک تولوک ءُ ہرا فوج ئنا فرمان آ من و عن عمل کیرہ۔
او پارے کہ داخس سال ئٹی ہزار آ بلوچ آتے زوراکی ئٹ بیگواہ و شہید کننگانے۔ بلوچ راج ہڑدیئی بنداو آ جون ہرفنگ ءِ۔ پاکستانی لشکر ریاستی تاغت و زوراکی نا زور آ کوزہ کرینے و بلوچ راج تینا راجی تاغت ئٹ مزاحمت کننگ ءِ۔
بی این ایم نا ترجمان پارے کہ بلوچ راج سگ و استقامت ئٹ سلوک ءِ۔ نن ہر وخت راجی آجوئی نا جہد ئنا سرسوبی نا سوچِن، ہمو دے الم برو کہ غلامی نا چیدہ 14 اگست تاریخ نا پنّو آتیان حرف غلط نا وڑ ڈھرو و محکوم راج آک تینا آجو آ ڈیہہ تیٹ شرفداری نا زند گدریفور۔
