بلوچستان نا بنجاہی شار کوئٹہ و پسنی آن مُسہ بندغ نا زوراکی ئٹ بیگواہی نا حوال رسینگانے۔
شابیتی حوال تا رد ئٹ پاکستانی لشکر 6 اگست آ سریاب روڈ آن اِرا ورنا۔ دزگیر کننگ آن گڈ بیگواہ کرینے۔
بیگواہ کننگوک بندغ آتا چاہنداری حاجی نور احمد ساتکزئی نا مار غلام نبی و گلزار ساتکزئ نا مار نعیم نا پن ئٹ مسنے ہرا ڈغاری کوئٹہ نا ہندی ءُ۔
تومکا بندغ آک کولا کانڑ ئٹی مزوری کریرہ۔ خاہوت اوفتا زوراکی ئٹ بیگواہی ئے پک کرینے۔
اندن بلوچستان نا دریابی شار پسنی ٹی دَرو شام ئنا اَسہ ورناس ئے پاکستانی لشکر بیگواہ کرینے ہرانا چاہنداری اللہ بخش نا مار صداقت نا پِن ئٹ مسُنے۔
یاتی مرے کہ بلوچستان ئٹی زوراکی نا بیگواہی تیٹ اَسہ وار ئس ولدا ودکی مسُنے، اگست نا اولیکو اِرا ہفتہ ٹی دائسکان اسہ درزن آن زیات ورنا تا زوراکی ئٹ بیگواہی رپورٹ مسنے۔
