بلوچ راجی مچی نا کاروان استو گریشہ آ سر مس۔ و گریشہ غان گڈ گدر ئٹ شہید اصغر نا اُراٹی فاتح خوانی آن پد داسا کاروان سوراب آ سر مسنے۔
گریشہ ٹی بلوچ راجی مچی نا شہید آتا یات ئٹ اسہ جلسہ ئس اڈ تننگا، ہراڑے ہزار آتا کچ ئٹ بندغ آک اوار مسُر۔ جلسہ ٹی ڈاکٹر ماہ رنگ بلوچ، صبغت اللہ بلوچ و ایلوفک ہیت کریر۔
کاروان اینو سُہب ئنا گریشہ آن گدر کن پیشتما، گدر ئٹ کیہی بندغ آک کاروان نا مونا بسُر۔ اوکان پد کاروان شہید اصغر بلوچ نا اُراغا ہنِسہ فاتحہ خوانی کرے۔
دا وخت راجی مُچی نا کاروان سوراب آ سر مسنے، ہراڑے بلوچ راجی مچی نا شہید آتا یات ئٹ دیوان بناء کننگانے۔
ہزار آ بندغ آک شہید آتے دروت ندر کننگ کن بلوچ راجی مُچی نا دیوان ئٹ اوار مسنو۔ دیوان نا بناء ئے بلوچ راجی سوت ئٹ کننگانے۔
دیوان ئٹ بلوچ راجی مُچی نا شہید آتے دروت ندر کننگ آن بیدس راجی سوغند ہم ہرفنگ مرو۔
