کنفیوشس آن شاگرد ئس سوج کرے، دا محدود آ زند ئٹ لا محدود مابت دیر تون کننگ مرے؟
کنفیوشس بیدس ٹک خلنگ آن پارے”ڈغار!“
و ہرکس ڈغار تون مابت کرے او محدود زند ئٹ لامحدود مس۔
اندا ہیت ئے سندھ ئنا شیدائی آ شاعر استاد بخاری ہم پارینے کہ
”ھُئن مٹی جی چپٹی آھیان
جئے دیس تہ پوءِ دھرتی آھیان!!!“
انت محدود آ زند ئٹ صباء دشتیاری لامحدود متو؟
ہمو کہ ڈیہہ ئنا رنگ آتیٹ رُلار۔ و ہمو ہم ہرا ڈیہہ ئے تینا دے ٹک ئٹ خیسُن کریر۔ و ہمو ہم ہرافتا سنگتی مش و توبے تون مریک۔ و ہمو ہم ہرا سسئی نا عشق ئنا وڑ مش تیٹ ہنار و تینٹ پنہوں مسر۔ و ہمو ہم ہرا ڈیہہ ئنا کوچہ آتیٹ رُلیرہ و ڈیہہ تون محبوبہ نا وڑ مابت کیرہ۔ و ہمو ہم ہرا بھاز ٹک خلیرہ و ہچ لکھنگ کپسہ و ہمو ہم ہرا ہچ ٹک خلپسہ بس اوشو نا وڑ تینا قلم آن تھفر نا کاریم ہلیرہ۔ و ہمو ہم ہرا دو تیٹ ڈیہہ ئنا آجوئی نا بیرک تورِسہ ہنِسہ کارہ۔ و ہمو ہم ہرا ڈیہہ ئنا پُھل آتتون مابت کون ءُ مابت کیرہ۔ و ہمو ہم ہرا ڈیہہ ئنا پِھر تیٹ اسہ پوسکنو سوغند ئسے تون چُھڑیرہ و بھاز ہوغِرہ۔ و ہمو ہم ہرا دانشور ءُ ولے بھاز خُلیرہ و ہمو ہم ہرا دانشور افس ولے کس آن خُلیپسہ۔ و ہمو ہم ہرا ڈیہہ کن شئیر لکھیرہ ولے بے پِن مریرہ و ہمو ہم ہرا ڈیہہ کن باگل خلیرہ۔ ہرا ڈیہہ ئنا چکل آتون مابت کیرہ و اوفتا سینہ ئٹ چٹوک نا وڑ تموک دیر ئنا توار بریک۔ و ہمو ہم ہرا ڈیہہ ئنا ڈغار آ رقص کیرہ و ناچ کرسا مِش مریرہ۔ و ہمو ہم ہرا ہچ پاپسہ ہرا شاید ہی وختس گڑاس پارہ!
و ہمو ہم ہرا کس ئنا ودار ءُ۔ و ہمو ہم ہرافتے داسا کس ئنا ودار اف۔ و ہمو ہم ہرا مابت نا وڑ ءُ۔ و ہمو ہم ہرا مابت نا دے تا وڑ ءُ۔ ہرا ڈیہہ تون تفوک ءُ و ڈیہہ اوفتے تینا غٹ ڈکھ آتے اندن پائک اندن کہ محبوبہ و لمّہ تینا عاشق و مار ئے تینا اُست ئنا ہیت آتے پائک!
محبت نا اسہ چُنکو دروشم ئس اسہ محبوبہ ئسے نا کلک آتیان دروت ہلنگ نا کیفیت ئٹی ءِ۔ و مابت نا بڑزکو دروشم ڈغار نا سندور ئے پیشانی آ خلنگ ئٹی ءِ۔ ڈغار تون اوار مرسا مِش مننگ ئٹی ءِ۔ مِش تون اوار مرسا مِش مننگ ئٹی ءِ۔ دا محدود آ جہان ئٹ انت ہوشو، ہیموں، شاہ عنایت، و ہمو کُل ہرا ڈغار آ ندر مسر مگہ لامحدود متور؟ اینو اوفتے انت تور ئسیٹ تور کرورے ہرا ڈغار نا عشق ئٹ دتر چُر مسر۔ ڈغار نا بیرک ئے بھاکر کریر و ڈغار نا خمب ئٹ مہر ئٹ خاچار!
اوفتیکن اسہ مہر بس اس
ڈیہہ تون مابت۔ ڈغار تون مابت۔ خاک تون مابت۔ ڈغار نا دھنز تون مابت۔ ڈغار نا رنگ آتون مابت۔ ڈغار کون آ بندغ آتون مابت۔ ڈغار نا بولی تون مابت۔ تینا تتون مابت۔ ڈغار نا پِھر ئتون مابت۔ ڈغار آ دے ٹک آن ہلیس توبے تون مابت۔ ڈغار نا دریاب تون مابت۔ نیل انگا دیر تون مابت۔ ڈغار آ پھیری کروک نت شپاد دھنزی آ نت تتون مابے۔ ہمو بندغ آتون مابت ہرا ہچ کننگ تپسہ او ڈغار آ جنگلی آ پُھل آتا وڑ ودی مریرہ و ولدا ہمو ڈغار آ پن پن مرسا تالان مریرہ۔ ہمو کہ ہرافتا نت تیٹ کوش اف۔ ہرافتا پِھڈ ئٹی اِرغ اف۔ ولے او ڈیہہ آ اندن ندر مریرہ دُنکہ مابت، مابت آ ندر مننگ مریک!
او بس اسہ وار مابت کیرہ۔ اوفتا ایمان ئٹ ارٹمیکو مابت مفک۔ او اسہ مابت ئٹ زند کیرہ و اسہ مابت آ کہیرہ۔ او مابت نا پنہوں نا سسئی مریرہ۔
”بلوچ راجی مُچی!“ ہم ڈیہہ کن سسئی ءِ۔
دا تینا پنہوں ئے پٹنگ ئٹی ءِ۔ ہمو پنہوں انتسے؟ محدود آن لامحدودیت نا سفر!!!
وختس محدود آن لامحدودیت نا سفر بناء مریک تو دا جہان بھاز چُنک مریک۔ دیہاڑ اندنو کڑد آتیان پُھر ءِ ہرا جہان نا تنگ دائرہ آن پیشتمانو و اوفتا گھامک ہموڑے تمار ہراڑے فِرائیک ءُ۔
او بس اسہ وار مابت کریر۔ ڈیہہ تون مابت۔ اوفتا اُست ئٹ پین ہچو مابت الو۔ او ڈیہہ تون مابت جوڑ مرسا اوار مسر۔ او مَش تا دامون ئٹ پُھل ئنا وڑ ترکرہ۔ نی اوفتے لتاڑوس او ولدا دے ٹک مرور۔ مگہ پِڑ ئٹ تروکوک آ بئے بیش تا نت تا شیفا لتاڑنگ مریک؟ بیشک ہمو بئے تا زی ئٹ کارہ بئیک شیف تمرہ۔ بیشک گدرینگرہ بئیک ولدا بُڑز مریرہ۔ کیہی بیش تا نت تا شیفا لتاڑنگ مروک بئے تے ای ولدا بُڑز و تازہ مننگ آ خنانُٹ۔ مگہ نُم دنو بئے خنتنُرے؟
ہرافتتون ڈغار مابت کرے او ہموخس زوت فنا مفسہ۔ ہرافتا باگل ئے مَشک خلیر او الم سرخ رو مریرہ۔ ہرافتا گھامک دریاب آ تمر، دریاب اوفتا گھام تے قرن آتے اسکان سنبھالک۔ نیل آ دیر اوفتا گھام تیا ندر مریک۔ آسمان اوفتیا مابت نا پِھر کیک و او ہمو ہنینا پِھر تیٹ چُھڑیرہ۔ اوفتیکن مَشک سُریرہ۔ اوفتے مَشک بھاکر کیرہ۔ او ڈیہہ ئنا سسئی مریرہ۔ مَشک اوفتیان سوج کیرہ نن نُم کن انت کین؟ او ولے اوفتے سسئی نا وڑ دا پاپسہ کہ
”ڈونگر مون سین روءِ۔کڈھی پار پنہوں جا!“
”پتھروں میرے ساتھ پنہوں کے لیے روو!“
ولے خل تے پارہ
”اول دھرتی
ایسری دھرتی
دھرتی زندہ باد!“
ہمو ہرا پِھر تا وڑ ءُ، مِش ئنا وڑ چُھڑنگ ئٹی ءُ
او مابت نا دروشم ءُ
و اوفتیکن بس اسہ مابت بس ءِ!!!
