حوال تا رد ئٹ بنگلہ دیش نا وزیر اعظم شیخ حسینہ استعفی ترسا ڈیہہ آن پیشتمانے۔ بی بی سی نا رد ئٹ شیخ حسینہ انڈیا غا ہنانے۔
حوال تا رد ئٹ ہزار آ برانزیک وزیر اعظم نا سرکاری رہینگ جاہ آ ارش کرسا گِڑا تے پرغانو و اُرا نا مڈی تے کشانو۔
بنگلہ دیش ئٹی حکومت نا برخلاف برانز و پولیس نا نیام ئٹ جھڑپ آتیٹ کم آن کم 90 بندغ بیران و کیہیک ٹپی مسنو۔ و وزیر اعظم شیخ حسینہ ڈیہہ آن پیشتمانے۔
ڈیہہ ئٹی خوانندہ غا تا سول نافرمانی تحریک برجاء ءِ۔ بنگلہ دیش نا بنجائی شار ڈھاکہ نا کنڈ آ لانگ مارچ مننگ نا گمان ارے ہرا نا سوب آن انٹرنیٹ سروس بند کننگانے و تیوہ ڈیہہ ئٹ کرفیو خلنگانے۔
جولائی ٹی بناء مروکا خوانندہ غا تا برانز بنداوی وڑ ئٹ سرکاری پوریا تیٹ کوٹا سسٹم نا برخلاف اس ولے دا بھاز زوت حکومت مخالف تحریک ئٹی مٹ مس۔
بنگلہ دیش نا آرمی چیف وقار الزمان پارینے کہ ڈیہہ ئٹی اسہ عبوری حکومت ئس جوڑ کننگو۔ تران ئٹ بنگلہ دیشی فوج ئنا کماش وقار الزماں نا پاننگ اس کہ نن اسہ عبوری حکومت ئس جوار کرون، داڑکن مچٹ سگ کبو۔
او برانز کروکا تے پارے کہ ننتو تعاون کبو، نن اوار اسہ گچینو مستقبل ئسے نا بناء ءِ کرون۔
