گریشہ خضدار بلوچستان آن پاکستانی لشکر جلہو کرسہ نیاڑی و چُنا تے لٹ کُٹ کننگ تون اوار گِڑا ہم درینے و شش بندغ بیگواہ کرینے۔
پاکستانی فوج ئنا جُلہو و ورنا تا زورئٹ بیگواہی نا برخلاف مخلوق برانز کرسہ کسر ئے بند کرینے۔
بیگواہ آک شاہ جان/سلیم، گوہر دین/خیر جان، مہم جان/لال بخش، میار/لال بخش، محمد عارف/عبدالرحمن و منیر/سبزو نا پِن ئٹ درست مسّنو۔
دا بارث ئٹ بلوچ یکجہتی کمیٹی نا راہشون ڈاکٹر ماہ رنگ بلوچ پارینے کہ ای گریشہ ٹی مروکا ریاستی زوراکی آ افسوس کیوہ۔ اینو سُہب ئنا ریاستی فوج کوچو گریشہ ٹی اُراتا جلہو کرسہ گِڑاس بندغ ئے زورئٹ بیگواہ کرینے و نیاڑی تون اوار گِڑاس پین بندغ خَلکنے ٹھپی کرینے۔
اونا پاننگ ءِ کہ ریاستی فوج اُراتان اِرا موٹر سائیکل، اِرا لکھ کلدار، ہشت موبائل و پین قیمتی ءُ گِڑا درینے و اُراتا شمسی نا پلیٹ آتے سُم کاری ئٹ پرغانے۔
ڈاکٹر ماہ رنگ مُستی پارے کہ ریاستی فوج ئنا کارندہ آتا دا زوراکی تا برخلاف علاقہ نا مخلوق بلوچ یکجہتی کمیٹی نا سنگت آتون اوار تولوک برانز کننگ ءِ۔ ای بندغی حق آتا تنظیم آتان خواست کیوہ کہ دا تدینی نا زیہا گام ہفّر و بلوچ الس دا نا برخلاف توار ہرفِہ۔
