سراوان خاران نا رہینگوک مختیار احمد مینگل باوہ نا پن حاجی عبدالحمید مینگل ئے پاکستانی فوج و اونا کارندہ آک درو بھتہ نا زیہہ آ بیگواہ کرینُہ۔
حوال آتا رِدئٹ، مختیار احمد مینگل درو پانزدہ جولائی آ سُہب ئتو ہشت ئنا وخت آ اُرا آن خاران شار آ ہِننگ ئٹی کسر آن ہفّنگانے۔ علاقہ نا مخلوق نا گمان ہندن اے کہ اودے بھتہ نا کاٹم آ بیگواہ کنّنگانے۔ حوال اے کہ ریاستی کارندہ آتا دُو آن بیگواہ مروک مختیار احمد زمیندار و کاروباری ءُ بندغ ئسے۔
خاہوت نا پاننگ کہ تدینی نا برخلاف ایف آئی آر آن پد ہم انتظامیہ گام ہفّنگ ئٹی اف۔
یات مرے کہ خاران ٹی ہڑدے دُزّی، پُھلنگ و بھتہ ہلّنگ ئٹی ریاستی کارندہ آتا دُو ارے۔
خاران نا غُٹ دُز و دھاڑیل آتہ ریاستی کمک رسینگک، بھاز وخت دُزی تیٹی ایجنسی تا تینا کارندہ آک ہم اوار مریرہ۔ ہرانا سوَب خاران انتظامیہ اوفتا برخلاف کاریم کپک۔
علاقہ نا مخلوق خاران نا غُٹ سیاسی تنظیم، سول سوسائٹی، کاروباری طبقہ، زمیندار ایکشن کمیٹی، وکیل، سوشل میڈیا آ کاریم کروک و خوانندہ گَل آتان خواست کرینے کہ او بیگواہ مروک مختیار احمد مینگل نا سلامت آجوئی کن توار ہفّر۔
