مسعود پزشکیان ایران نا صدر گچین کننگا، ایرانی میڈیا نا پاننگ کہ مسعود پزشکیان صدری نا گچین کاری نا ارٹمیکو مرحلہ ٹی اسہ کروڑ شست ءُ سئے لکھ وؤنٹ ہفّینے ہندن اونا مقابل رجعت پسند سعید جلیلی اسہ کروڑ سی ءُ پنچ لکھ وؤنٹ ہفّے۔
ایران نا وزارت داخلہ مسعود پزشکیان نا سرسوبی نا پڑو کرسہ پارے کہ شست ءُ نُہہ سال ئنا مسعود پزشکیان غُٹ آن بھاز وؤنٹ ہفسہ ایران نا صدر گچین کننگانے۔
نمے سما اے کہ مسعود پزشکیان نوزدہ سد ءُ نوَد ءُ چھار ئٹی کار ئنا تدینی سیٹ زائیفہ و اسہ چُنا سے نا دنیا ئے الّینگ نا غم ئے خنا، زائیفہ آن پد او اِرا مار و مسڑ ئے بھلُن کرے و ارٹمیکو برام ئے کتّو۔
دا تدینی آن پد او سیاست نا پِڑ آ بس و صدر محمد خاتمی نا وخت آ ڈپٹی وزیر صحت و پدا وزیر صحت نا وڑئٹ کاریم کرے۔ پدا پنچ وار پارلیمنٹ نا باسک و اسہ وار نائب صدر رہینگا۔
ایران نا صدری نا گچینکاری ٹی اولیکو مرحلہ ٹی چھار آن اسہ اومیت وار ئس ہم پنجا فیصد آن گیشتر وؤنٹ ہفتو۔ اولی ٹی بیست ءُ ہشت جون آ مروکا گچین کاری ٹی وؤنٹ آتا ٹرن آؤٹ چِھل فیصد رہینگا ہرا نوزدہ سد ءُ ہفتاد ءُ نُہہ آن پد غُٹ آن گیشترا ٹرن آؤٹ اس۔
مئی ٹی ایرانی صدر ابراہیم رئیسی نا ہیلی نا تدینی ٹی دنیا ئے الّنگ نا سوَب وخت آن مہالو صدری نا گچین کاری مسّنے۔
