بلوچ راجی زْرمبشت (بی این ایم) نا ہیل کاری دیوان "بلوچستان ٹی زور ئٹ بیگواہی و بندغی حق آتا ادارہ آتا کڑد” نا سرہال آ اڈ تنّنگا۔ دیوان ئے سنبھالوکا برطانیہ ہنکین نا باسک و کیپسٹی بلڈنگ کونسل نا بھلا حفیظ عبداللہ و دیوان نا کمک کار نیدرلینڈ ہنکین نا سنگت دیدگ بلوچ اس۔ ہندن سرہال نا زیہا بی این ایم نا بندغی حق آتا شعبہ (پانک) نا میڈیا فوکل پرسن جمال بلوچ و بی ایچ آر سی نا جنرل سیکریٹری کمبر مالک تینا خیال آتا درشانی ئے کریر۔
"کیپسٹی بلڈنگ کونسل” نا کُنڈان بی این ایم نا ہیلکاری دیوان نا رِدئٹ دا ہودمیکو دیوان اس۔
دیوان ئٹی بلوچستان ٹی زور ئٹ بیگواہی و بندغی حق آتا ادارہ آتا کاریم آ سرجمی ئٹ ہیت کننگا۔ جمال بلوچ اسد مینگل و احمد شاہ کرد نا زور ئٹ بیگواہی آ ہیت کرسہ بیگواہی آن خاہوت آتہ رسینگوکا دڑد آ پارے کہ او پاننگ کننگ مفک ہمرکہ سمی و مہلب چُنا اسّہ تینا باوہ نا پٹّینگ پٹینگ ئٹی ورنا مسّہ اوفتا دڑد درشان ئٹی بفک۔
حفیظ عبداللہ نا سوج آ جمال بلوچ پارے کہ بھازا ادارہ آتا کچ ئٹی فرق بھلو مسئلہ ئس اف، بنیاتی ہیت دادے کہ غُٹ امنّا کیرہ کہ زور ئٹ بیگواہی مننگ ئٹی اے و ریاستی ادارہ آک کننگ ئٹی ءُ۔
کمبر مالک جہانی مخلوق نا چُپی نا سوَب اوفتا سیاسی و معاشی مفاد ئے پارے، اونا پاننگ آ اقوام متحدہ و ایلو جہانی ادارہ آک ہندن کاریم کپسہ بلکہ سہی کننگ آ کاریم کیرہ۔ مُستی پارے کہ ریاست مخلوق ئے خُلیفنگ کن زور ئٹ بیگواہی آن کاریم ہلیک کہ نوا کس اوڑان برخلاف ہیت کپ۔
دیوان ئٹی کمبر مالک دا ہم پارے کہ جہانی قانود نا رِدئٹ مخلوق نا رکھ ریاست نا زمہ واری اے و زور ئٹ بیگواہیک بندغی حق آتان برخلاف ءُ۔
