بلوچستان نا ضلع کیچ ئنا تحصیل تمپ دازن نا ہندی نواز نا مار براہمدغ ءِ استو پاکستانی لشکر دازن ئٹی اونا اُراغان ارٹمی وار زوراکی ئٹ بیگواہ کرے۔
خاہوت نا رِد ئٹ پاکستانی لشکر استو سئے بجہ غا اُراغا چھاپہ خلیسہ اُرا نا بندغ آتے لٹ کُٹ کرے اوفتے خُلیفیسہ اُرانا موبائل آتے پُھلیسہ ہژدہ سالی براہمدغ ئے لٹ کُٹ کرِسہ بے قانودی دزگیر کننگ آن پد بیگواہ کرے۔
یاتی مرے کہ دا ورنا ئے داکان مُست 14 اکتوبر 2023 آ پاکستانی لشکر زوراکی ئٹ بیگواہ کریسس، اوکان پد 6 فروری 2024 آ یلہ کننگا۔
خاہوت نا رِد ئٹ چُنک سن آ ورنا نا ارٹمی وار زوراکی ئٹ بیگواہی آن اونا خاؤت فریشان ءِ۔ او کُل سیاسی، چاگِردی، بندغی حق آتا ادارہ آتیان خواست کریر کہ اونا آجوئی کن توار بڑز کیر۔
