اقوام متحدہ نا بندغی حق آتا نمائندہ میری لالر پارینے کہ ماہ رنگ بلوچ آ ایف آئی آر کننگ فریشانی نا ہیت اسے، بلوچ یکجہتی کمیٹی نا دیوان ئسے آن پد پولیس اوڑا مقدمہ کرینے ہرا افسوس نا ہیت اسے۔ او پارے کہ خیال آتا درشانی ہر اسٹ نا حق ءِ۔
ڈاکٹر ماہ رنگ بلوچ پارینے کہ پولیس نا کُنڈ آن بلوچ یکجہتی کمیٹی نا باسک آتا ایف آئی آر بےقانودی ءِ۔
او پارے کہ ملازم آتے تینا ڈپٹی آن توننگ، ہنگامہ کننگ، ریاست نا مننگ نا مذمت، اونا ایسری و غداری نا ہیت، نہ بیرہ بےبنیات ءِ بلکہ ملک ئنا قانود نا ہم برخلاف ءِ، اسہ پھاش ءُ نا انصافی اسے ہرانا برخلاف ننے کُل ئے بش مروئی ءِ۔
او پارینے کہ ضابطہ فوجداری نا دفعہ یک سد و نوَد و شش، ہژدہ سد و نوَد و ہشت ئنا حساب آ اسہ عدالت ئس ہم پاکستان پینل کوڈ نا باب VI یا IX-A نا رد ئٹ سزا نا قابل یا ضابطہ نا دفعہ "123A یا 124A” نا رد ئٹ سزا نا قابل جرم ئنا نوٹس ہلوف، ایتم اِسکان کہ وفاقی یا صوبائی حکومت نا حکم ئٹ یا اونا اختیار ئٹ یا او حکومت آتان بااختیار ءُ افسر ئسے نا کُنڈ آن مروکا شکایت متنے۔ انت دا ایف آئی آر ئے وفاقی یا صوبائی حکومت آتا کُنڈ آن پولیس کرفّینے؟
ڈاکٹر ماہ رنگ بلوچ پارینے کہ داکان بیدس ہژدہ مئی آ ہنتس مس اودے مچّا جہان خنا۔ صحافی تا یونین پریس کلب آ پولیس نا جلہو نا برخلاف برانز کرے و صوبائی اسمبلی نا کاروائی آن بائیکاٹ کرے۔ وزیراعلیٰ بلوچستان صحافی یونین آن معافی خواہا و یقین تس کہ او تدینی نا پٹ و پول ئے کرو۔ ولے امن ئٹ سیاسی کاریم تے توننگ کن کنتون اوار بیبگر و شاہ جی نا برخلاف دروغ ئنا مقدمہ کننگانے۔
او پارے کہ دا ریاست نا مُتکنو چم ئسے ہراد مہالو سیاسی کاریم کروکاتا برخلاف کاریم ئٹی ہتنگاکہ، اوفتے ہر ہفتہ عدالت آ ہتفنگاکہ۔ دا کنے پرغنگ یا چُپ کرفنگ کپّک، نن دا نا برخلاف بش مرون جہد کرون۔
