بلوچ راجی زْرمبشت (بی این ایم) نا کُنڈان بلوچستان ٹی پاکستانی دھماکہ آتان برخلاف برانزی ریلی ئس کشّنگا۔
برانز کروکاتا دُو تیٹ کارڈ و بینر اس ہرافتا پاکستانی ایٹمی سِلا و بلوچ ئے خلّنگ نا برخلاف نعرہ نوشتہ اس۔
برانز ئٹی بی این ایم نا باسک ڈاکٹر لطیف بلوچ تْران کرسہ پارے کہ بیست ءُ ہشت مئی بلوچستان و بلوچ راج ئکن مونو دے ئس ءِ، پاکستان نا کُنڈان چاغی بلوچستان ٹی جوہری تجربہ بلوچ ئے چُک ءَ چُوری کننگ ئسے۔ دا تجربہ آن نہ بیرہ ماحول بلکہ بندغاتا جان جوڑی ہم خراب مسّنے۔ علاقہ ٹی سِل ئنا کینسر، پِھف، جغر و باسُن ہِڷ ئنا ویل آک تالان مسّنُہ۔
او پارے کہ ننا برانز نا مکست بلوچستان ٹی پاکستانی جوہری دھماکہ نا نسخان آتے دنیا نا مون آ تخنگے۔ پاکستان ایلو مُلک آتے ہم جوہری طاقت کِن کمک کرسہ دنیا نا سلامتی ئے نسخان ٹی شاغانے۔
بی این ایم نا باسک عالیہ بلوچ پارے کہ جوہری دھماکہ آتان ودی مروکا تابکاری و زمین ئے نسخان نا سوَب چاغی ٹی کِشت و کشار بےمننگ نا بریبر ءِ۔ پاکستان اول دے آن بلوچ دشمنی نا کاریم ئے کننگ ئٹی ءِ۔ جہانی مخلوق ئے پاکستان نا برخلاف گام ہفّوئی ءِ تاکہ پین ملک ئس دہنا تجربہ آ ہمت کننگ کپ۔
ماہرہ بلوچ تْران کرسہ پارے کہ پاکستان چاغی ٹی جوہری دھماکہ آن مہالو تینے جہان ئٹ سوگو نشان تِس ولے چاغی ٹی مخلوق ئے اوڑان نسخان رسینگا۔ ماحول نا خراب مننگ و تابکاری آن ودی مروکا ناجوڑی تان اوڑے نا رہینگوکاک ہمپینُہ۔
زہرہ بلوچ پارے کہ بلوچ راج بھلو وخت ئسے آن پاکستانی ریاست نا ظلم و تادی تا گْواچی ءِ۔ چاغی ٹی دھماکہ آتان اوڑے نا مخلوق بھلو نسخان کُننگ ئٹی ءِ، اوڑے ودی مروکا چُناتیٹ نَت ءَ دُو آن کُرّو ہم ودی مریک۔
