نوشت: تاسوزوایشیکارا
براہوئی مٹ: درناز رحیم
“اگہ نی راستین نا کور مسوس تو ای دا ڈکھ ئے سگنگ کروفٹ۔ نے دکہ کُننگ و تہارمئی ٹی کاٹم خلنگ آ خننگ کروفٹ۔ خدا کے دُن مف نہ تو ننا غٹ مستقبل تباہ مرو۔”
اونا زائیفہ تول ءَ بش کرسا وختس مدان مدان آ و وختس زور آن دنو ہیت کننگ اس۔ داسا اودے باور مننگ اس کہ اونا زائیفہ اوڑتون مسخرہ کننگ اف بلکہ بے کچ ڈکھیائی، سوبر و مایوس ءِ۔ او پاریکہ “دنو دے برے اوکان مُست جوان ءِ کہ نن کہین۔”
او بِنگکہ، چُپ مسکہ، کوشست کریکہ کہ تینٹ ہچو تران کروئی تمپ۔ زائیفہ تہ پاریکہ “بر نن تینے کھسفن، دا وڑ زندہ مننگ تو مرگ آن ہم گندہ مرو۔” بھاز وخت اونا زائیفہ اندنو ہیت کریکہ کہ اودے منّوئی تماکہ۔ چُپی نا کُلف ئے پرغاکہ و او دا وڑ ورندی تسکہ۔
“ درو شام ئنا بیرُم آ لیٹوک کنا اُست ئٹ نا گمان آ اسہ خیال ئس بس۔ ولدا ای ہُریسکان ٹک خلکُٹ۔ فرض کر اگہ ای راستین نا کور مریو، تو ای انت کروٹ۔ کور انگا بندغ کن جہان ئٹ اخس کاریم ارے کہ او زندہ مننگ کن کے ولے بندغ ئے زندہ رہینگ کن گڑاس نہ گڑاس تو کروئی تمک۔ خیر، ای تو اسہ کسر ئس کشانُٹ، ای سوچانُٹ کہ ای جاسوسی کسہ لکھوٹ۔ ہئو! دا کاریم ئے تو ای کننگ کیوہ۔ ای نے پارِسہ کروٹ نی کسہ غا تے لکھیس۔ دُن کاریم اڑزان مرو و جوانو پوریا ہم رسینگو ننے۔ ہُر دادے مسخرہ ئس پُہہ مفیس، ای جاسوسی کسہ لکھنگ کیوہ۔”
او دا وختا خن تا پڑدہ غا تے ڈھکوک خن تیٹ تینٹ مون ئے تینا زائیفہ نا کنڈ آ کریسس۔ اونا بَج دریچہ نا کنڈ آ اس۔ ہراکان چِھلہ نا ہنینا دیمون تہٹی بننگ اس۔ اونا زائیفہ سوبری ئٹ ٹک خلنگ اس، “کہ راستین نا اونا اَرغ کور مرسا کرے و او جاسوسی کسہ لکھنگ بناء کرے تو امر خننگو۔ کور انگا خنک ہرا ہنینا دیمون ئے خننگ کپرور۔ و او دا کور انگا و بے نور آ خن تیٹ تینا جاسوسی کسہ آتا کڑدار تے تینا تصور ئٹ پھیری کننگ آ امر خنو۔ اوندھائی اونا تیبہ کائنات جوڑ مرو۔ او خوہ۔۔۔ دا جاسوسی کسہ غاک، خون، دتر، چاخو، خنجر، پستول، ڈوہدار نا اسٹ ایلو تون دو پہ دو مننگ۔ اسٹ ایلو تون میڑنگ و اسٹ ایلو ئے ٹپی کننگ نا ندارہ غاک۔۔۔” اونا زائیفہ ئے اندن گمان مس کہ اونا گوࣿر ئٹ کسس خنجر ئس غت تس۔
“گڑا مگہ کنا اَرغ، ہرا اوندھائی و تہارمہ ءُ جہان ئسیٹی رہینگو، تینا جہان آن ہم زیات تہارمہ و گندہ ءُ چاگڑد ئس تخلیق کرو؟”
اودے دا خیال نا تصور آن لڑزہ ہرفے۔
“نہ۔۔۔نہ۔۔۔” او چیہانٹ ئس خلک۔ “ کنے دا وڑ دوست اف۔”
ای دا کُل ئے خننگ کروفٹ۔ داڑان تو دا جوانے کہ “ نن کہین۔” او تینا زائیفہ نا ہیت ئے بِنگ تو بشخندہ کرے۔
داسکان دا فیصلہ متوسس کہ او کور مسنے یا نہ۔ داسکان اونا خن تیا پٹی تفوک اس۔ ولے ہنتس کہ مسس نا گمان آ مسس، اونا نظر نا گمان آ نزور مسس۔ خن تا کوک آک پرِسُر۔ دا حالیت بھاز تکلیف دہ اس۔ انتئے کہ خن تا ٹیلہ غاک بھاز زیمی مننگ اسر۔ داسا اونا خنک پٹی تا بَج آ ڈھکوک اسر و۔۔۔ ہچ پاننگ متوکہ کہ او جہان ئے دوارہ خننگ کرو یا نہ ؟
مُچا دے او ریڈیو بِنگکہ۔ نن و دے ئنا وختا اونا زائیفہ اودے اخبار خواناکہ بنفیکہ و ہرا وخت ریڈیو نا خبر تیٹ وقفہ مسکہ تو او سوچنگ بناء کریکہ کہ ای اگہ کور مسُٹ تو کنا مستقبل امر مرو؟
اسہ اِرا وار او تینا زائیفہ نا ہیت آتیان زیمی ہم مس۔ او ٹک خلک، جوانی انداٹی ءِ کہ بچوکا زند ئے تہارمئی تیٹ کاٹم خلنگ و دِکہ کُننگ نا جاگہ غا بندغ خودکشی کے۔ ولے دا خیال تینتو تینٹ اونا اُست آن پیشتماکہ۔ ہئو۔۔۔ جاسوسی کسہ لکھنگ نا بارو ئٹ او واقعی سوبر اس۔ دا اسہ دلچسپ و ہیجان انگیز تحریک ئس اس۔ ہرا اودے غٹ آن جتا ءُ ہیت سوچنگ آ بیوس کرے او کیہی دے اسکان جاسوسی کسہ آتا پلاٹ و کڑد آتا بارو ئٹ سوچسہ کرے ولے منَہ دے آن پد دا تحریک تینٹ شیف تما۔ کور مننگ نا خیال آن اونا وجود ئٹ ہرا تتر بتر بناء مسس او ہم داسا گیمرینگِسہ اس و زیات وخت اندن مسکہ کہ اودے تینا کور مننگ نا خیال آن ہچو فریشانی متوکہ بلکہ او مطمعین خننگاکہ۔
او اسہ چُنا ئسے نا وڑ اِرغ کُنگکہ۔ برنج آک اونا باء ٹی ہِننگ آن مُست شولنگارہ۔ ٹیبل آ تموک مسرہ، اونا زائیفہ تینا غصہ ئے کیدِسہ خار ئٹ اودے ہُراکہ۔ اسہ دے او سگنگ کتو و ترخِسہ پارے۔
“مگہ نی داسکان اِرغ کُننگ ہم ہیل کتنُس۔”
منَہ دے آن اودے اندن گمان مسکہ کہ اونا زائیفہ اوڑان مُر مسنے۔ اوفتا نیام ئٹ مُری زیات مسنے۔ اگہ دُن متوکہ گُڑا اونا زائیفہ اوڑا انتئے دُن چِھڑاکہ۔ کنا خنک تفوک ءُ ولے او تو ہر گِڑا ئے خنِک۔ اودے تینا یکئی نا بھاز زیات مارشت مسکہ۔ تینا و تینا زائیفہ نا نیام ئٹ ودی مروکا دا خلاء نا مارشت اوڑا اندن زیات سوار مس کہ او دا ہم استان درے کہ ڈراخ جوڑ آ بند آتے ہم وخت وخت غصہ بریک۔
اونا زائیفہ اونا مونا مچھی تخِسہ مچھی نا غٹ پِت آتے کشاکہ۔
مچھی نا پِت آتے کشنگ نا وختا اودے بھاز ڈکھ مسکہ۔ اندن کہ او اسہ ورنا ءُ امبل و اَرغ نا اِرغ آتے تخنگ اف بلکہ مُسہ چھار سال ئنا چُنا ئسے بھلن کننگ نا ذمہ واری ئے پورو کننگ ءِ۔
اونا اَرغ ئے ہم مچھی کننگ نا وختا ہچ مزہ بتوکہ۔ اونا ہڑب آک تینتو تینٹ سُرارہ مون تہ ہر وڑ ئنا تاثر آن خالی مسکہ۔ “بھلا پِت آتیان بیدس مچھی کُننگ نا انت مزہ ئس بَننگ کیک۔”
برنج و مچھی ٹیبل آ تالان مننگ اسر۔ اونا زائیفہ اونا اِرغ آتیان دو ئے کشا۔ او اودے اِرغ کُننگ آ ہُرِسہ ہوغنگ بناء کرے۔
“دا نی ٹیبل نا انت حال ئے کرینُس۔”
او چُپ اس۔ ولے تہٹی او غصہ آن جوش خلنگ اس۔
اونا زائیفہ اودے وختس دو ٹی و وختس آستونک ئٹی ہلیسہ گلی ٹی دریکہ۔ ٹیکسی والو سے توار خلِسہ سلیفیکہ، اودے ٹیکسی ٹی سوار کننگ آن گڈ تینٹ توسکہ۔ ڈاکٹر نا کلنک نا مونا ٹیکسی ئے سلیفیکہ، اونا دو ٹی ہلِسہ ڈاکٹر آ دریکہ، ڈاکٹر اندن احتیاط ئٹ ہیت کریکہ۔
“آپریشن سرسہب ہم مننگ کیک و۔۔۔۔ کنا مطلب ءِ کہ مایوس مفبو۔” اونا زائیفہ نا ذہن ئٹ خیال ئس بسکہ و بش مسکہ۔ استان دریکہ کہ او اراڑے تولوک ءِ۔ ہڑدے وختس او تینا ارغ ئے ڈاکٹر آ دننگ کن تیار کننگ مسکہ تو سوچاکہ “ای زرس میک اپ کیو۔” اونا است ورندی تسکہ کہ دا تو جوانو ہیت ئس اف۔ وختس کہ ارغ کور مرے گُڑا تینے ٹہل کننگ و زیبا خننگ نا انت فائدہ۔ ولدا او است ئنا ہیت ئے ہلتوکہ و زرس میک اپ کریکہ۔ وختس پیشن پیشتماکہ تو است آن تہ توار بسکہ۔
“میک اپ دیر کن کرینس۔ پینا بندغ آتیکن؟”
او لڑزاکہ۔۔۔
اولیکو وار وختس اُراٹی اونا ارغ نا خن تا پٹی تے مٹ کننگا تو او ارغ آن تینا سوج کرے۔
“مگہ نی کنے خننگ اُس؟”
“اسہ ٹِک ئس، بھلو ٹِک ئس خننگک۔”
او اونا مونا مُسہ پینڈی ئے ہتِسہ سوج کرے۔
“اخس پینڈی ءُ؟ “
“ای پاننگ کپرہ۔”
“کوشست تو کر۔” اودے پین خار بس و تینا دو ئے زرس پین اونا خن تا خڑک آ ہیس۔ “داسا پار”
“ای پاننگ کپرہ، ای ہچ ئس خننگ افٹ”
او غصہ ئٹ رٹیسہ بش مس۔
اونا ارغ ئے اندن گمان مس او بےسہب مسنے۔ تینا شکی گری و غصہ ئے ڈھکِنگ کن نرمی ئٹ پارے:
“زو کنا بیرم تے شاغ۔”
“مگہ نے تُغ ہلنگ ئٹی ءِ؟”
“بس ای لیٹنگ خواہوہ۔”
او تینا اَرغ آ اسہ چمشانک ئس شاغا۔ ہولن و تازہ غا کلک آک، ودوکا ریش، او تینتو تینٹ بشخندہ کرے۔ زو زو دیر باسِفے ولدا اونا پد ئٹ سلیس و اونا ریش ئے شیو کننگ بناء کرے۔
“مچت مونا بَواس۔” او تینا زائیفہ ئے پارے۔
او اونا مونا بس سلیس۔ او زمین آ ڈھول مرِسا گڑاس پٹنگ بناء کرے۔ اونا دوک اونا زائیفہ نا نت تیا لگار تو اونا زائیفہ پارے۔
“دا انت کننگ اُس؟” او مخنگ بناء کرے۔
“ای ساندہ نا نت تا توار ئے بنِوہ، نی چرینگِسہ تو نا نت تا توار بھاز غیر معمولی مریک۔ کنا ذہن ئٹ خیال بس کہ نا نک فِرا ءُ مرور۔ داسا ہُر کنا خنک اسر تو ای ہچ وختس غور ئٹ ہتوسٹ کہ نا نک امرونو۔ داسا دو خلکٹ تو کنا اندازہ راست مس۔ راستیکا نا نک فِرا ءُ نو۔”
تینا اَرغ نا دا ہیت آتیا او زرس فریشان مس ولے چُپ سلیس۔ اونا زائیفہ ئے جتا جتا ءُ ہبکہ کروکو خیال آک پلویڑ کریر۔ “دا کنا نرینہ ءِ، کنا ارغ ءِ۔ داڑتون ای تینا زند ئنا اخس سال گدریفینٹ۔ ارغ زائیفہ نا نیام ئٹ ہچو حجاب ئس مفک ولے داسا کنے بدر بدر انتئے لگیک۔“ ولدا اونا وجود تہارمئی تیٹ تار کننگ بناء کریکہ۔ وختس او دا کیفیت ئٹ مسکہ تو سوچاکہ “اگہ ای کور مریو تو۔۔۔ او ہم کور ای ہم کور۔۔۔ ولدا چارمہ کنڈ آ تہارمئی مرو۔ نن ہڑتوما دا تہارمئی ٹی اسٹ ایلو نا دو تیٹ ہلِسہ زند گدریفنگ کننگ کرون؟ کنے ٹی مایوسی نا داخس زار انتئے ودی مسنے!”
او تینے ہم کور گمان کننگ بناء کرے اسہ اندنو جہان ئس جوڑ کننگ بناء کرے ہراٹی اود و اونا ارغ رہینگارہ۔ ہراڑے ہچو دیوال الو۔ ہچو ہڑاند الو۔ بس تہارمئی ہی تہارمئی اس۔ وختس سہب تما تو اونا ارغ اونا دو ئے نرمی ئٹ ہلک۔
“داسا پٹی تا خواست اف، دافتے دھڑف۔”
“انتئے۔۔۔؟” او حیرانی ئٹ پارے
“ای چاوہ کہ ای کور مسونٹ۔”
منَہ پاس کن اونا زائیفہ نا تیبہ وجود بارِس۔ ولدا او بے اختیار پارے، “روشنائی و تہارمئی ٹی بھاز فرق تو اف۔”
او اونا خن تیان پٹی تے دھڑفنگ بناء کرے۔ وختس پٹیک دھڑنگار تو او پارے، “اسہ پاس ئسے کن تینا خن تے تو ملہ۔”
او تینا بند انگا خن تے ملا۔
ہڑتوما خنک پیہُن و مُڑدہ اسر۔ او خلیس۔ اونا ارغ مُچا زند ئٹ اودے داخس خلیفتویسس اختس کہ دا اسہ پاس ئٹی تینا پیہُن آ خن تے نشان ترسا بیم تسس۔
او ہیسکنگ اس تو اونا ارغ اونا دو ئے ہلِسہ پارے۔
“بِنواس! انتس کہ مس جوان مس۔ داسا نن بائدے دا گواچنی ئے منین کہ ای کور مسونُٹ و نی اسہ کور ئسے نا زائیفہ اُس۔ داسا نن دا سوچن کہ اسہ کور ئسے کن ارا جوان و مناسب کاریم ئس مننگ کیک ہرادے او بیدس ہڑاند آن کننگ کیک۔ ہُر ننے مایوس و بے امیت مروئی اف۔ داسکان زند ئنا دامون ئٹ نن کن بے کچ خوشی ارے۔”
اونا زائیفہ تینا مون ئے اونا کوپہ غا تیا کرے۔ او بھاز چُپی ئٹ خڑینک شولنگ اس ولے اسہ وار ہم اودے مرگ ئنا خیال بتو۔ کور مننگ داخس بیم تروک الو اخس کہ مرگ اس۔
او تینا ارغ نا پاسوئی ہُرِسہ بشخندہ کرے۔
